سولتۇستىك قازاقستاندا ناۋرىز كۇندەرى 600 دەن استام ءىس- شارا وتەدى
حالىقتىق سەرۋەندەر پەتروپاۆلدىڭ ورتالىق الاڭىندا 21 - ناۋرىز كۇنى باستالادى. قالا تۇرعىندارى مەن قوناقتارى ناۋرىز كوجەدەن، باۋىرساقتاردان، پالاۋدان تەگىن ءدام تاتادى. دوستاستىق ۇيىندە ەتنومادەني بىرلەستىكتەردىڭ قاتىسۋىمەن مەرەكەلىك باعدارلامالار، «ناۋرىز كۋبوگى» كۆن- ءىنىڭ وبلىستىق فەستيۆالى، ءسابيت مۇقانوۆ اتىنداعى قازاق مۋزىكالىق دراما تەاترىندا مەرەكەلىك كونسەرت جوسپارلانعان.
ەلىمىزدىڭ 9 وبلىسىنان كەلەتىن سۋىرىپ سالما اقىنداردىڭ قاتىسۋىمەن رەسپۋبليكالىق ايتىس پەن كيىز ءۇي كونكۋرسى وتكىزىلەدى. ءبىلىم بەرۋ مەكەمەلەرىندە سىنىپ ساعاتتارى، تاڭەرتەڭگىلىكتەر، سالتاناتتى جينالىستار مەن ناۋرىز مەيرامى تاقىرىبىندا كونسەرتتەر جوسپارلانعان. مەكەمەلەردە، ۇيىمداردا جانە وبلىستىق كاسىپورىنداردا سوعىس جانە ەڭبەك ارداگەرلەرىنىڭ، قۇرمەتتى ازاماتتاردىڭ، عىلىمي جانە شىعارماشىلىق زيالى قاۋىم وكىلدەرىنىڭ قاتىسۋىمەن سالتاناتتى جينالىستار وتەدى. قايىرىمدىلىق اكسياسى اياسىندا مۇمكىندىگى شەكتەۋلى بالالاردى، اتا- اناسىنىڭ قامقورلىعىنان ايىرىلعان جانە جەتىم بالالاردى، از قامتىلعان وتباسىلاردان شىققان بالالاردى «نەپتۋن» اكۆاپاركىنە جانە اتتراكسيوندارعا تەگىن الىپ بارۋ كوزدەلگەن. 20 ونەركاسىپپەن اينالىساتىن كاسىپورىندار مەن كوتەرمە فيرمالار ازىق- تۇلىكتەردى تومەن باعادا ساتۋدى ۇيىمداستىرادى.
22 - ناۋرىز كۇنى ەتنواۋىلداردىڭ قاتىسۋىمەن نەگىزگى مەرەكەلىك ءىس- شارالار ورتالىق الاڭدا جالعاسىن تاۋىپ، ساحنالىق جانە سپورتتىق الاڭدار ۇيىمداستىرىلادى. 23 - ناۋرىز كۇنى كورەرمەندەردىڭ نازارىنا «ارمىسىڭ ءاز ناۋرىز!» اتتى كونسەرتتىك- ويىن- ساۋىقتىق باعدارلاما مەن بالالارعا ارنالعان «سالتىمىزدى ساقتايىق» تەاترلاندىرىلعان- تانىمدىق باعدارلاما ۇسىنىلادى. وبلىستىڭ بارلىق 13 اۋدانىندا سپورتتىق ءىس- شارالار، سونىڭ ىشىندە گرەك- ريم كۇرەسىنەن وبلىستىق چەمپيوناتى، شاڭعى جارىسىنىڭ بىرىنشىلىگى، باسكەتبولدان وبلىستىق چەمپيونات، كوركەم گيمناستيكا، ۇلتتىق سپورت تۇرىنەن جارىستار جوسپارلانعان.
