قازاقستاندا زەينەتاقى قورىنا جىل سايىن 600 ميلليارد تەڭگەدەن استام قارجى تۇسەدى
بۇل جايىندا ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى تامارا دۇيسەنوۆا ءمالىم ەتتى، دەپ حابارلايدى قازاقپارات.
«ءبىرىڭعاي جيناقتاۋشى زەينەتاقى قورىنا جىل سايىن 600 ميلليارد تەڭگەدەن استام قارجى تۇسەدى. بۇل 2010 -جىلمەن سالىستىرعاندا شامامەن 2 ەسەگە كوپ. نەگىزگى بەلسەندى قاتىسۋشىلار جالدامالى جۇمىسشىلار بولىپ وتىر. ولاردىڭ سانى شامامەن 5,5 ميلليون ادام. 1998 -جىلدان بەرى ولار تولىق قاتىسىپ كەلەدى»، - دەدى مينيستر.
دۇيسەنوۆانىڭ اتاپ وتۋىنشە، ءوزىن- ءوزى جۇمىسپەن قامتىعان حالىقتىڭ زەينەتاقى جيناعىنا قاتىستى پروبلەما بار.
«بۇل رەتتە سىزدەردىڭ نازارلارىڭىزدى ءوزىن- ءوزى جۇمىسپەن قامتىعانداردىڭ 2013 -جىلدان بەرى وڭ ناتيجە كورسەتە باستاعاندىعىن ايتقىم كەلەدى. سالىق كوميتەتىندە تىركەلگەندەردىڭ 31 پايىزى سول جىلى زەينەتاقى جارناسىن تولەدى. 2016 -جىلى بۇل سان 40 پايىزعا جەتىپ، جارنا سوماسى ءبىر جىلدا 38,7 ميلليارد تەڭگەگە جەتتى. دەگەنمەن، وقتىن- وقتىن پروبلەمالار تۋىنداپ وتىرادى. ولار سالىق زاڭناماسىنا سايكەس 4 رەت اۋدارىم جاسايدى»، - دەدى مينيستر.
اۆتور: مارلان جيەمباي
