كۋرچاتوۆتا 600 ورىندىق قازاق مەكتەبى اشىلدى

«نۇرلى جول» باعدارلاماسى بويىنشا سالىنعان № 4 جالپى ءبىلىم بەرەتىن ورتا مەكتەپ № 1 مەكتەپتىڭ ءۇش اۋىسىمدا ءبىلىم الۋ ماسەلەسىن شەشۋگە باعىتتالعان، دەپ جازادى وبلىستىق «ديدار» گازەتى.
قالا اكىمى نۇربول نۇرعاليەۆ قۇتتىقتاۋ سوزىندە جاڭا مەكتەپ ءوسىپ كەلە جاتقان ۇرپاققا ءبىلىم مەن تاعىلىمدى تاربيە بەرەتىنىن ايتىپ ءوتتى. جاڭا مەكتەپ ۇجىمىنا ەلىمىزدىڭ پاتريوتتارى مەن بىلىكتىلىگى جوعارى مامانداردى تاربيەلەۋ جولىنداعى ەڭبەكتەرىنە ساتتىلىك تىلەدى.
مەكتەپتىڭ قۇرىلىسىنا 867 ميلليون تەڭگە ۇلتتىق قوردان ءبولىندى. مەكتەپتىڭ قۇرىلىسىنا 3,2 گ ا اۋماقتى الاتىن جەر تەلىمى بەرىلگەن. مەكتەپتىڭ اۋماعى 2-ايماققا بولىنگەن: دەنە شىنىقتىرۋ- سپورت جانە ءارتۇرلى جاستاعى وقۋشىلارعا ارنالعان قيمىل- قوزعالىس ويىندار الاڭدارى بار دەمالىس ايماعى. جاڭا مەكتەپتە وقۋ پروتسەسىن ىڭعايلى ەتۋ ءۇشىن بارلىق جاعداي جاسالعان. سىنىپتار كومپيۋتەرلىك تەحنيكامەن، ينتەراكتيۆتى تاقتالارمەن، كورنەكتى ادىستەمەلىك قۇرالدارمەن جابدىقتالعان.