13:04, 16 - ءساۋىر 2016 | GMT +5
ءۇندىستاندا لاس اۋانىڭ كەسىرىنەن جىلىنا 600 مىڭ ادام كوز جۇمادى
استانا. قازاقپارات - ءۇندىستان استاناسى نيۋ-دەلي قالاسىندا اۋانىڭ لاستانۋىن ازايتۋعا باعىتتالعان تاجىريبەنىڭ ەكىنشى كەزەڭى باستالدى.
الداعى 15 كۇندە تاق كۇندەرى تاق ءنومىرلى، جۇپ كۇندەرى جۇپ ءنومىرلى كولىك يەلەرى عانا جۇرە الادى. قالا اكىمشىلىگى وسى ادىسپەن كوشەلەردەگى كولىك سانىن 1 ميلليونعا ازاياتىنىنا ءۇمىتتى. ال ەرەجەنىڭ تولىق ساقتالۋىن پوليتسيا قاداعالايدى. تاجىريبەنىڭ العاشقى كەزەڭى جىل باسىندا وتكەن. نيۋ-دەلي - الەم بويىنشا اۋاسى ەڭ لاس قالالاردىڭ ءبىرى. وسىنىڭ سالدارىنان قالاداعى وقۋشىلاردىڭ جارتىسى وكپە اۋرۋىنا شالدىققان. ءۇندىستاندا لاس اۋانىڭ كەسىرىنەن جىلىنا 600 مىڭ ادام كوز جۇمادى. «اۆتوكولىكتەردەن شىعاتىن كوك تۇتىننەن بالالارىمىز اۋرىپ ءجۇر، جۇرەگى اينىپ، قۇسادى. كەيدە ءىشى وتەدى. ۇنەمى اۋرۋحاناعا باراتىن بولدىق»، - دەيدى نيۋ-دەلي تۇرعىنى تۋلسي ديەۆي.
www.khabar.kz
