سەمىزدىك پروبلەماسىنىڭ 60-70 پايىزى گەنگە بايلانىستى - حيرۋرگ المانتاس مالياتسكاس
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ليتۆا مەديتسينالىق ۋنيۆەرسيتەتىنىڭ پروفەسسورى، حيرۋرگ المانتاس مالياتسكاس ءمالىم ەتتى.
«سەمىزدىڭ پروبلەماسى ۇلكەن، سەبەبى بۇگىندە الەمدە بۇل ەپيدەميا (كەڭ تارالعان اۋرۋ - رەد.) رەتىندە بەلەڭ الۋدا.
سوندىقتان ونى دەرت دەپ قابىلداعان ءجون. ادامعا 40-50 كەلى سالماق ءتۇسىرۋ ءۇشىن ەلەۋلى ەرىك كۇشى كەرەك، ياعني ارتىق سالماقتان قۇتىلۋ وڭاي ەمەس. ويتكەنى، بۇل تۇرعىدا بىرنەشە فاكتورلار بار. ولاردىڭ بىرىنە توقتالاتىن بولسام، سەمىزدىك پروبلەماسىنىڭ 60-70 پايىزى گەنگە بايلانىستى، ال گەندى وزگەرتۋ نەمەسە وعان قارسى تۇرۋ دا وتە قيىن»، - دەيدى عالىم.
ونىڭ سوزىنە قاراعاندا، سوڭعى كەزدە عىلىم سالماعى شەكتەن تىس ەمدەلۋشىلەردە توقشىلىقتى رەتتەيتىن گورموندار ازداۋ بولاتىندىعىن انىقتادى.
«قازىرگى كەزدە ازىق- تۇلىك پەن تاعام تۇرلەرىنە قولجەتىمدىلىك وتە جوعارى دەڭگەيدە، سونداي- اق تاماقتىڭ مايلىلىعى دا از ەمەس. وسى ورايدا ادامداردىڭ وزدەرىنىڭ گەندەرىنە قارسى تۇرۋ وڭاي ەمەس. بۇل سالماعى شەكتەن تىس اۋىر ادامدارعا وپەراتسياسىز سالماق جوعالتۋ وتە قيىنعا تۇسەدى. ءبىز حيرۋرگتەر رەتىندە سەمىزدىككە شالدىققانداردىڭ بارشاسىنا وپەراتسيا جاساي المايتىندىعىمىزدى تۇسىنەمىز. الايدا، جۇرەك- قانتامىر اۋرۋلارى، قانت ديابەتى سەكىلدى ىلەسپە دەرتتەرى پايدا بولاتىن ناۋقاستار بار. سالماقتى تومەندەتىپ، اسقازاندى كىشىرەيتەتىن بارياتريكالىق حيرۋرگيا بۇگىندە مەديتسينالىق جانە ەكونوميكالى تۇرعىدا جاقسى ناتيجە بەرۋدە. ناۋقاستار وپەراتسيادان كەيىن وزدەرىن جاقسى سەزىنەدى»، - دەدى المانتاس مالياتسكاس.
اۆتور: رۋسلان عابباسوۆ
