6 جىلدا 18 فۋتبول كلۋبىن قارجىلاندىرۋعا 200 ميلليارد تەڭگەدەن استام قارجى بولىنگەن - انتيكور
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى تۋريزم جانە سپورت مينيسترلىگىمەن بىرلەسىپ وتاندىق سپورتتى قارجىلاندىرۋ سالاسىنداعى جەمقورلىق تاۋەكەلدەرىنە سىرتقى تالداۋ جۇرگىزدى.
تالداۋ ناتيجەلەرى بويىنشا مەملەكەتتىك قاراجاتتىڭ ءتيىمسىز جۇمسالۋىنا اكەلەتىن ءبىرقاتار فاكتور انىقتالىپ وتىر.
«جوعارى جەتىستىكتەر» جانە «بۇقارالىق» سپورتتى قارجىلاندىرۋ اراسىنداعى الشاقتىق 2023 -جىلى سپورتتىڭ جوعارى جەتىستىكتەرىن قارجىلاندىرۋ بۇقارالىق سپورتقا قاراعاندا 9 ەسە كوپ»، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتىندا.
ودان ءارى اگەنتتىك وكىلى سەبەپتەردى اتادى، الدىمەن قارجىلاندىرۋدىڭ اشىق بولماۋى.
«اگەنتتىك «ءولى جاندارعا» ەسەپتەۋدىڭ، قوسارلانعان قارجىلاندىرۋدىڭ (جان باسىنا شاققانداعى قارجىلاندىرۋ بالالار جانە جاسوسپىرىمدەر سپورت مەكتەبىنىڭ تاربيەلەنۋشىلەرىنە بولىنگەن)، تۋريستىك فيرمالاردىڭ قىزمەتتەرىن ناقتى باعادان جوعارى باعامەن ساتىپ الۋدىڭ، جوعارى سپورتتىق ءبىلىم تۋرالى ديپلومداردى قولدان جاساۋدىڭ جۇيەلى فاكتىلەرىن انىقتادى»، - دەيدى ول.
سونىمەن قاتار سپورت ۇيىمدارىنىڭ تىركەلمەگەن سپورت پاندەرى بويىنشا جەڭىستەر ءۇشىن قوسىمشا اقى تولەۋ فاكتىلەرى بايقالعان.
«بۇل ءتاسىل وليمپيادالىق ەمەس جانە كەڭ تارالماعان، جەڭىسكە جەتۋ وڭايىراق سپورت تۇرلەرىن دامىتۋعا تۇرتكى بولادى. سپورت عيماراتتارى مەملەكەت ءۇشىن قولايسىز جاعدايلاردا ساتىلادى جانە بەرىلەدى، سودان كەيىن وسى وبەكتىلەر جاڭا مەنشىك يەلەرىنەن جالعا الىنادى. ودان بولەك، ۋاكىلەتتى ورگان ۆەدومستۆولىق باعىنىستى ۇيىمنىڭ جۇمىس ىستەمەيتىن شتاتىنا قاراجات بولەدى»، - دەيدى رەسمي وكىل.
جەمقورلىق تاۋەكەلدەردىڭ تاعى ءبىرى - سپورت فەدەراتسيالارى مەن كاسىبي كلۋبتاردىڭ نەگىزسىز قارجىلىق شىعىندارى.
«سوڭعى 6 جىلدا تەك 18 فۋتبول كلۋبىن قارجىلاندىرۋعا 200 ميلليارد تەڭگەدەن استام قارجى بولىنگەن. مۇنداي شىعىندارمەن قازاقستان FIFA الەمدىك رەيتينگىندە تومەن پوزيتسياعا ورنالاسقان. ەڭ قىمبات كلۋب «سامۇرىق- قازىنا» ا ق - دان دەمەۋشىلىك كومەك العان «استانا» ف ك (50,1 ميلليارد تەڭگە)، ودان كەيىن «بارىس» حوككەي كلۋبى (48,9 ميلليارد تەڭگە). سونىمەن قاتار كوپ بولىگى ەڭبەكاقى تولەۋ قورىنا، ءبىرجولعى تولەمدەرگە، ترانسفەرگە، اگەنتتىك كەلىسىمدەرىنە جۇمسالعان. بۇل قاراجاتتى يگەرۋ جوعارى جەمقورلىق تاۋەكەلدەرىن تۋدىرادى»، - دەدى د. بيگايداروۆ.
ودان بولەك، ءوز ينفراقۇرىلىمىنىڭ بولماۋىنا بايلانىستى كلۋبتار جىل سايىن الاڭدار مەن مۇز ايدىندارىن جالعا الۋعا ميلليونداعان قاراجات جۇمسايتىن بولىپ شىقتى.
ءسوز سوڭىندا اگەنتتىك وكىلى جوعارىدا اتالعان تاۋەكەلدەر بويىنشا اگەنتتىك ۇسىنىستار ازىرلەنگەنىن جانە ونىڭ ورىندالۋى باقىلاۋدا ەكەنىن ايتتى.
