12:55, 20 - تامىز 2016 | GMT +5
ۋساما بەن لادەننىڭ كوزىن جويۋ جايلى كىتاپ اۆتورى ا ق ش ۇكىمەتىنە 6,6 ميلليون دوللار تولەيدى
استانا. قازاقپارات - پاكىستانداعى «ءال- كايدا» تەررورلىق توبىنىڭ جەتەكشىسى ۋساما بەن لادەننىڭ كوزىن جويۋ وپەراتسياسى جايىندا كىتاپ جازعان امەريكالىق ارنايى جاساقتىڭ وتستاۆكاداعى جاۋىنگەرى قول قويىلعان قۇپيا اقپاراتتى تاراتپاۋ تۋرالى كەلىسىمدى بۇزعانى ءۇشىن ا ق ش بيلىگىنە $6,6 ميلليون تولەيدى.

بۇل تۋرالى جۇمادا Associated Press اگەنتتىگى حابارلادى.
ۇكىمەت بيسسونەتت (اۆتورىن مارك وۋەن بۇركەنشىك ەسىممەن شىعارعان) كىتاپ جارىق كورەر الدىندا ا ق ش قورعانىس مينيسترلىگى مەن باسقا ۆەدومستۆولارعا ونى ىقتيمال قۇپيا مالىمەتتەردىڭ بولۋى تۇرعىسىنان رەسەنزيالاۋعا مۇمكىندىك بەرمەگەنىن مالىمدەدى.
مامىلەنىڭ شارتتارىنا سايكەس بيسسونەتت ءتورت جىل ىشىندە بيلىككە $6,6 ميلليون تولەۋگە مىندەتتەلەدى. بۇل بۇرىنعى قىزمەتكەردىڭ كىتاپتى ساتۋدان تۇسىرگەن پايدا سوماسىنا تەڭ.
ۋساما بەن لادەن 2011 -جىلى 2 -مامىردا بىرنەشە جىل جاسىرىنىپ جاتقان پاكىستاندىق اببوتاباد قالاسىندا امەريكالىق ارنايى جاساقتىڭ قۇپيا وپەراتسياسى ناتيجەسىندە ءولتىرىلدى.