گۇلميرا ساتىبالدى تۇرسىن الاگوزوۆكە 6,5 ميلليارد تەڭگەنىڭ اكسيالارىن قايتارادى
«گۇلميرا ساتىبالدىدان ت. الاگوزوۆكە كەلتىرگەن ماتەريالدىق جانە مورالدىق زالالدى ءوندىرىپ الۋ تۋرالى ازاماتتىق تالاپ ءىشىنارا قاناعاتتاندىرىلسىن. گ. ساتىبالدىدان ماتەريالدىق زالال كەلتىرگەنى ءۇشىن جابىرلەنۋشى ت. الاگوزوۆتىڭ پايداسىنا 6,5 ميلليارد تەڭگە كولەمىندە «Galanz bottlers» اق جاي اكسيالارىنىڭ % 43- ى ءوندىرىپ الىنسىن. سونىمەن قاتار، گ. ساتىبالدىدان مورالدىق زالال كەلتىرەگەنى ءۇشىن 1 ميلليون تەڭگە ءوندىرىلسىن. ودان بولەك، مەملەكەتتىڭ كىرىسىنە جانە مەملەكەتتىك باج رەتىندە 65,8 ميلليون تەڭگە ءوندىرىلىسىن»، - دەدى سۋديا كەمەڭگەر يماشيەۆ.
سونداي- اق، سوت گۇلميرا ساتىبالدىنىڭ جازاسىن قاۋىپسىزدىگى ورتاشا دەڭگەيدەگى مەكەمەدە وتەيتىنى تۋرالى قاۋلى شىعاردى.
«ۇكىم شىعارىلعان ساتتەن باستاپ زاڭدى كۇشىنە ەنەدى. گ. ساتىبالدى جازاسىنىڭ مەرزىمى قاماۋعا الىنعان ساتتەن باستاپ، ياعني 2022 -جىلعى 16-ناۋرىزدان بەرى 1,5 تاۋلىككە ءبىر كۇن قاماۋدا ۇستاۋ ەسەبىنەن زاڭدى كۇشىنە ەنگەنگە دەيىن ەسەپتەلسىن»، - دەيدى سۋديا.
بۇگىن استاناداعى №2 بايقوڭىر اۋداندىق سوتىندا گۇلميرا ساتىبالدىعا 7 جىلعا باس بوستاندىعىنان ايىرۋ جازاسى تاعايىندالدى.
ەسكە سالايىق، گۇلميرا ساتىبالدى كاسىپورىنداردىڭ قاتىسۋ ۇلەسىن زاڭسىز يەمدەنۋ، سونىڭ ىشىندە ادام ۇرلاۋمەن ۇشتاسقان ەكى فاكتى بويىنشا تەرگەۋگە الىنعان ەدى. جابىرلەنۋشىگە كەلگەن زالال سوماسى - 6,6 ميلليارد تەڭگەدەن اسادى.
سونداي- اق، گۇلميرا ساتىبالدىنىڭ سوتقا دەيىنگى تەرگەۋ كەزىندە شەكارا اسىپ كەتپەك بولعانى بەلگىلى بولدى.
ول سوتتا ايىبىن ءىشىنارا عانا مويىندادى.
ايتا كەتسەك، پروكۋرور گۇلميرا ساتىبالدىنى 8 جىلعا باس بوستاندىعىنان ايىرۋدى سۇراعان ەدى.
سونىمەن قاتار، گۇلميرا ساتىبالدى ايىپتاۋلارمەن كەلىسپەيتىنىن ايتىپ، ءادىل شەشىم قابىلداۋعا ءوتىنىش جاساعان بولاتىن.
