تۇركيادا 6,4 ماگنيتۋدالىق جەر سىلكىنىسى بولدى

انكارا. انادولى - قازاقپارات - دۇيسەنبى كۇنى تۇركيانىڭ حاتاي قالاسىنا قاراستى دەفنە اۋدانىندا 6,4 ماگنيتۋدالى جەر سىلكىنىسى تىركەلدى، دەپ حابارلايدى قازاقپارات تۇركيانىڭ Anadolu اگەنتتىگىنە سىلتەمە جاساپ.

اگەنتتىك تاراتقان اقپاراتقا قاراعاندا، ءزىلزالانىڭ وشاعى 2 ك م. تەرەڭدىكتە جاتىر.

پرەزيدەنت رەجەپ تايپ ەردوعان وڭتۇستىكتەگى حاتاي پروۆينتسياسىندا ورنالاسقان تۇركيا ۇكىمەتى جانىنداعى تابيعي اپاتتار مەن توتەنشە جاعدايلار باسقارماسىنىڭ ۇيلەستىرۋ ورتالىعىندا بولعاننان كەيىن كاحرامانماراشتاعى ءزىلزالا كەزىندە 114834 ادامنىڭ قۇتقارىلعانىن ءمالىم ەتتى. سونداي- اق 1 ميلليون 684 ادام ۋاقىتشا باسپانامەن قامتاماسىز ەتىلدى.

ونىڭ سوزىنشە، ءبىرىنشى كەزەڭدە 100 مىڭ كونتەينەرلىك ءۇي پايدالانۋعا بەرىلەدى. ولاردىڭ 65 مىڭى قۇرىلىپ جاتىر. قاجەت بولعان جاعدايدا ولاردىڭ سانى 200 مىڭعا جەتكىزىلەدى.

پرەزيدەنت جەر سىلكىنگەن ايماقتا تۇرىپ كەلگەن، قازىرگى تاڭدا پالاتكادان سالىنعان ۇيلەر مەن مودۋلدى قۇرىلىمداردا تۇرىپ جاتقان ادامدار جىل سوڭىنا دەيىن جاڭا باسپانا الاتىنىن ءمالىم ەتتى.

تۇركيا باسشىسى ناۋرىز ايىنان باستاپ، حاتاي پروۆينتسياسىندا 40426 ءۇيدىڭ قۇرىلىسى باستالاتىنىن جەتكىزدى. ولاردىڭ ىشىندە كاحرامانماراشتا – 45067، ادىياماندا 25882، گازيانتەپتە 18544 ۇي سالىنادى.

ەليازىگ پروۆينتسياسىندا 3750، اداندا - 2500، كيليستە 250 ءۇي سالىنادى.

ەسكە سالايىق، 6- اقپاندا كاحرامانماراشتا ماگنيتۋداسى 7 بالدان اساتىن ەكى جەر سىلكىنىسى بولدى. جەراستى دۇمپۋلەرى ەلدىڭ 10 پروۆينتسياسىندا، سونداي- اق كورشىلەس مەملەكەتتەردە، سونىڭ ىشىندە سيريادا دا سەزىلدى.

تۇركيادا جەر سىلكىنىسىنەن قازا تاپقاندار سانى 41 مىڭنان استى.

اۆتور

ايدار وسپاناليەۆ