بايقوڭىرداعى 6 قازاق مەكتەبى مەن 1 بالاباقشا قازاقستاندىق ستاندارتقا تولىق كوشەدى - ب. ساعىنتايەۆ - فوتو
وعان ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ، رەسەي ۇكىمەتى ءتوراعاسىنىڭ ورىنباسارى دميتري روگوزين، قىزىلوردا وبلىسىنىڭ اكىمى قىرىمبەك كوشەربايەۆ قاتىستى.
بۇل تۋرالى وبلىستىق اكىمدىكتىڭ باسپا ءسوز قىزمەتىنەن حابارلادى.
كوميسسيا وتىرىسىندا تاراپتار بايقوڭىر قالاسى مەن اقاي، تورەتام ەلدى مەكەندەرىن دامىتۋ، ونداعى الەۋمەتتىك سالانى جانداندىرۋ، «بايقوڭىر» كەشەنىن بىرلەسىپ پايدالانۋ بويىنشا جول كارتاسىنىڭ ورىندالۋ بارىسىن تالقىلادى. جيىننان سوڭ ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ جۋرناليستەرگە سۇحبات بەرىپ، تالقىلانعان ماسەلەلەر جونىندە بايانداپ بەردى.
- ءبىلىم بەرۋ، دەنساۋلىق ساقتاۋ سالالارىندا ءبىرقاتار ماسەلەلەر بولدى. وسى جيىن بارىسىندا وڭ شەشىم تابۋعا قول جەتكىزدىك. ماسەلەن، بايقوڭىرداعى 6 قازاق مەكتەبى مەن 1 بالاباقشا قىركۇيەك ايىندا قازاقستاندىق ستاندارتقا تولىق كوشەدى.
ال پەرزەنتحانا بويىنشا قۇجاتتارعا بايلانىستى كەمشىلىكتەر بولىپ تۇر. ەكى اي ىشىندە بۇل ماسەلەلەر قارالادى. ەگەر رەسەي تاراپىنان قولداۋ تاپپاعان جاعدايدا ءوزىمىز قارجىلاندىرىپ، پەرزەنتحانانى ىسكە قوساتىن بولامىز، - دەدى ب. ساعىنتايەۆ.
سونداي- اق «بايتەرەك» عارىش زىمىران كەشەنىنىڭ بىرلەسكەن جوباسى تالقىلاندى. 2021 -جىلى بۇل كەشەننىڭ قۇرىلىسى باستالادى. وعان دەيىن قاجەتتى ماماندار دايارلاناتىن بولادى. ايتا كەتەيىك، عارىش كەڭەستىگىنە ءۇشىنشى قازاقستان ازاماتىن ۇشىرۋ جونىندە ەكى تاراپ كەلىسىمگە كەلدى. ەندى ونىڭ ۋاقىتىن رەسەي تاراپى بەلگىلەيتىن بولادى.
تۋريزم سالاسىن دامىتۋ ماسەلەسى دە ءسوز بولدى. عارىش كەڭەستىگى مەن قورقىت اتا كەشەنىنە تۋريستەردى كوپتەپ تارتۋ ماقساتىندا جوبالار دايىندالادى. بۇل سالادا بىرلەسىپ اتقارار جۇمىس اۋقىمدى.
كەزدەسۋ ناتيجەسىندە تاراپتار قازاقستان مەن رەسەي عارىش سالاسىندا ىنتىماقتاستىقتى ءالى دە تەرەڭدەتە تۇسۋگە ىنتالى ەكەنىن اتاپ ءوتتى.
