نۇر-سۇلتان، الماتى جانە شىمكەنتتە 5G قاشان قوسىلادى
بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتى ءتوراعاسىنىڭ ورىنباسارى ءزۇلفيا قۇدايبەرگەنوۆا ءمالىم ەتتى، دەپ حابارلايدى قازاقپارات ءتىلشىسى.
«قازىرگى ۋاقىتتا نۇر-سۇلتان، الماتى جانە شىمكەنت قالالارىندا 5G تەستىلەۋدەن ءوتىپ جاتىر. پيلوتتىق رەجيمدەگى تەستىلەۋ جىل سوڭىنا دەيىن اياقتالىپ، اتالعان قالالاردا 5G تولىق ەنگىزىلەتىنى جوسپارلانىپ وتىر. 5G ءدى ەنگىزۋ اۋكتسيون ارقىلى ەلىمىزدەگى بارلىق بايلانىس وپەراتورلارىنىڭ قاتىسۋىمەن وتەدى. قاتىسۋشى وپەراتورلارعا ارنالعان تالاپ بار. الدىمەن رەسپۋبليكالىق ماڭىزى بار 3 قالادا ەنگىزىلەتىنى كوزدەلگەن. ال 2024-جىلعا دەيىن وبلىس ورتالىقتارىن 5G مەن قامتۋ جوسپاردا بار»، - دەدى ءزۇلفيا قۇدايبەرگەنوۆا ەلوردادا بايلانىس تاقىرىبىنا ارنالعان اشىق ەسىك كۇنىندە.
ونىڭ ايتۋىنشا، ازىرگە اۋىلدى جەرلەردى 5G- مەن قامتۋ تۋرالى ءسوز قوزعاۋعا ەرتە. سونداي-اق سپيكەر «قازاقستاندا 5G ەنگىزىلسە ينتەرنەت باعاسى وزگەرۋى مۇمكىن بە؟» دەگەن ساۋالعا جاۋاپ بەردى.
«جوق، باعا قىمباتتامايدى. جالپى حالىق ءۇشىن 4G ينتەرنەتىنىڭ كۇشى جەتكىلىكتى. 5G نەگىزىنەن «اقىلدى» قالالار مەن كاسىپورىندار ءۇشىن قاجەت. ياعني جوعارى ساپالى ينتەرنەتپەن ءبىر ساتتە بىرنەشە جەلىنى قوسىپ جۇمىس ىستەۋگە بولادى»، - دەيدى ول.
