بيىل ەلىمىزدە 5G ينتەرنەت قوسىلا باستايدى - ۇكىمەت باسشىسى
بۇل تۋرالى ماجىلىستەگى «Nur Otan» پارتياسى پارلامەنتتىك فراكسياسىنىڭ كەڭەيتىلگەن وتىرىسىندا ۇكىمەت باسشىسى اسقار مامين ايتتى، دەپ حابارلايدى قازاقپارات ءتىلشىسى.
«شاعىن جانە مونوقالاردى قوسا العاندا، قالالاردا ءومىردىڭ جايلى جانە ءقاۋىپسىز جاعدايىن قامتاماسىز ەتۋ جۇمىسى جالعاسادى. 2023 -جىلعا قاراي ۇلەسكەرلىك قۇرىلىستاعى بارلىق پروبلەمالى تۇرعىن ۇيلەردىڭ قۇرىلىسى اياقتالادى. 2025 -جىلعا قاراي بارلىق رەسپۋبليكالىق جولدار جاڭعىرتىلىپ، جوندەلەدى جانە جول بويىنداعى سەرۆيسپەن قامتاماسىز ەتىلەدى»، - دەدى ۇكىمەت باسشىسى «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋ باعدارلاماسىن ورىنداۋدىڭ جول كارتاسىن تالقىلاۋ بارىسىندا.
پرەمەر-ءمينيستردىڭ ايتۋىنشا، بيىل 2,2 مىڭ شاقىرىم اۆتوموبيل جولى جاڭعىرتىلىپ، رەسپۋبليكالىق جولداردىڭ 66 پايىزى جول بويىنداعى سەرۆيسپەن قامتاماسىز ەتىلەدى.
«2025 -جىلى بارلىق وبلىس ورتالىعى مەن رەسپۋبليكالىق ماڭىزى بار قالالار جوعارى جىلدامدىقتى 5G ينتەرنەتپەن قامتىلاتىن بولادى. بيىل نۇر-سۇلتان قالاسىندا، 2022 -جىلى الماتى قالاسىندا پيلوتتىق ىسكە قوسۋ جۇزەگە اسىرىلىپ، ودان كەيىن رەسپۋبليكالىق ماڭىزى بار قالالاردا جانە بارلىق وبلىس ورتالىقتارىندا وندىرىستىك پايدالانۋعا ەنگىزىلەدى»، - دەدى ول.
ۇكىمەت باسشىسى نۇر-سۇلتان، قاراعاندى، جەزقازعان جانە تەمىرتاۋ قالالارىنىڭ 350 مىڭنان استام تۇرعىنى كوگىلدىر وتىنعا قول جەتكىزەتىندىگىن ايتتى.
«2021 -جىلى 68 مىڭ ادام گازعا قول جەتكىزىپ، ودان كەيىن جىل سايىن كەڭەيتۋ ەسەبىنەن ماقساتتى كورسەتكىشكە جەتكىزىلەدى»، - دەدى اسقار مامين.