الاياقتارعا 5 ميلليون تەڭگەگە جۋىق الدانىپ، قازىر نەسيەسىن وتەپ جۇرگەن قىزدىڭ وقيعاسى

ونىڭ سوزىنشە، تانىسىنىڭ قىزى الاياقتارعا الدانىپ قالعان، - دەپ حابارلايدى Massaget.kz ءتىلشىسى.
جۋرناليستىڭ سوزىنشە، الاياقتار ونلاين تۇردە قىز بالانىڭ اتىنان ءبىر بانكتەن 1900000 جانە ەكىنشى بانكتەن 243100 تەڭگەگە نەسيە العان.
«بارىڭىزگە ساباق بولسىن دەپ جازىپ وتىرمىن. وقيعانىڭ ءمانىسى بىلاي: الدىمەن ونىڭ WhatsApp-نومىرىنە الاياقتار «ءسىز حالىق بانكتەن 2 ميلليون نەسيەگە تاپسىرىس بەردىڭىز بە؟» دەگەن اۋديو-قوڭىراۋ جىبەرگەن. شوشىپ كەتكەن قىز «جوق» دەسە، «وندا ءسىز بازادان شىعىپ تۇرسىز. ەگەر ءوتىنىش تاستاماساڭىز وندا الاياقتار ءسىزدىڭ اتىڭىزدان نەسيە العالى جاتىر. مەن سىزگە ءبىر قوسىمشا (پروگرامما-ەسك.) جىبەرەم، سونى تەلەفونىڭىزعا جۇكتەڭىز، سول ارقىلى ەكەۋمىز ول نەسيەنى كەرى قايتارامىز دەگەن. قورقىپ كەتكەن قىز بالا دەرەۋ، ول قوسىمشانى جۇكتەپ العان. ار جاقتان تاعى دا «استىندا ءبولىسىڭىز دەگەن دەگەندى باسىڭىز» دەگەن كوماندا بەرگەن. ءاي اڭقاۋ بالا-اي، (بالا دەگەندە بويجەتكەن قىز) ءبولىسۋدى باسىپ جىبەرگەن عوي. سول-اق ەكەن، الاياقتار ونىڭ تەلەفونىن باسقارىپ كەتكەن. «نە ىستەپ جاتىرسىڭ؟» دەپ سۇراسا، «ءسىز ەشتەمە باسپاڭىز، مەن جاڭاعى تاپسىرىستى جويىپ جاتىرمىن» دەگەن»، - دەيدى جۋرناليست.
ءبىرازدان سوڭ تەلەفونىن ءوشىرىپ تاستاعان.
«ەرتەڭىنە بالاما اقشا جىبەرەيىن دەپ، حالىق بانك قوسىمشاسىن اشايىن دەسەم، بۇعاتتاۋلى تۇر» دەيدى. ج. 7111-گە قوڭىراۋ شالىپ، سەبەبىن سۇراعاندا بارىپ نەسيە راسىمدەلىپ كەتكەنىن ءبىراق بىلگەن. الاياقتار مىنا قوسىمشا ارقىلى ج- نىڭ اتىنان جاڭا كارتا اشىپ العان (...) بۇل قانداي سۇمدىق دەسەڭىزشى!!! وسىنداي ونلاين كرەديتتەن جاپا شەگىپ جۇرگەندەر كۇننەن كۇنگە كوبەيىپ كەلەدى. قاشان حالىقتىڭ الاياقتارعا قارسى يممۋنيتەتى ابدەن قالىپتاسقانشا وسى ونلاين كرەديتتى توقتاتۋعا بولماي ما؟
باياعىدا ءاربىر ايالدامادا كرەديت بەرەتىن پۋنكتەر اشىلىپ، ەلدىڭ ءبارى بوسقا بەرىپ جاتقانداي لاپ-لاپ نەسيە الىپ، سونىڭ زاردابىن ءالى تارتىپ جۇرگەندەر قانشاما. ونلاين نەسيە راسىمدەۋدىڭ سونشالىقتى قولجەتىمدى بولىپ كەتكەنى قالاي؟ نەسيە كەرەك ادام بانككە ءوزى بارادى ەمەس پە؟ انشەيىندە ەكى شوقىپ ءبىر قارايتىن بانك قالايشا تەپ-تەز ونلاين نەسيە بەرە سالادى؟ ەندى ونى زاڭ ورىندارى قالاي تەكسەرەدى؟ بانك وسىنداي جابىرلەنۋشىلەردىڭ نەسيەسىن كەشىرە مە؟ سۇراق كوپ، جاۋاپ قيىن... ساق بولىڭىزدار! ەگەر بانكتەگى نەسيەنى نە ىستەۋگە بولاتىن جولىن بىلسەڭىزدەر ايتا وتىرىڭىزدارشى»، - دەپ جازدى گۇلنار ماعزۇموۆا.
ەسكە سالايىق، بۇعان دەيىن اقمولا وبلىسىندا الاياق زەينەتكەردىڭ اتىنان 2 ميلليون تەڭگەدەن اسا نەسيە راسىمدەپ العانىن حابارلاعان بولاتىنبىز. 25- شىلدە كۇنى شورتاندى اۋداندىق ءى ءى ب كەزەكشى بولىمىنە دامسا اۋىلىنىڭ 64 جاستاعى تۇرعىنى جۇگىنگەن. قارت كىسى 2023-جىلدىڭ قاڭتار-مامىر ايلارى ارالىعىندا ءوز اتىنان بەلگىسىز بىرەۋ حالىق بانكىنەن 1300000 تەڭگە اقشالاي نەسيە جانە Kaspi بانكتەن 1 ميلليون تەڭگە تاۋارلىق نەسيە بەرگەنىن ايتتى. كەلتىرىلگەن شىعىننىڭ جالپى سوماسى 2300000 تەڭگە.