كىتاپ وقۋعا قاتىستى توپ-5 كەڭەس

استانا. قازاقپارات- كىتاپ وقۋ - مي جاتتىعۋى. كىتاپپەن دوستاسقان ادام اقىلى تولىسىپ، پاراساتتى بولا تۇسەدى. ءارى ءوز ويىن ناقتى، اشىق ايتا الاتىن بولادى. كىتاپتى كوپ وقۋ ويلاۋ جۇيەمىزدىڭ جاقسارۋىنا، قيالىمىزدىڭ دامۋىنا، سونىمەن قوسا سوزدىك قورىمىزدىڭ ارتۋىنا وزىندىك ىقپال ەتەدى.

عالىمداردىڭ ايتۋىنشا، كىتاپتى جىلدام وقىعاندا كوز كوپ شارشامايدى ەكەن. ال ادامداردىڭ 95 پايىزى كىتاپتى وتە باياۋ وقيدى. بار بولعانى مينۋتىنا 180-200 ءسوز. كىتاپتى اسىقپاي وقىعاندا ادام وقىعانىنىڭ 60 پايىزىن تۇسىنسە، جىلدام وقىعاندا 80 پايىزىن تۇسىنەدى. كىتاپ وقۋ كەزىندە وقىرماننىڭ كوزدەرى ءار ءارىپتى جەكە سۋرەت رەتىندە كورسەتەدى، ال مي ولاردى ءبىر سۋرەتكە بىرىكتىرەدى ەكەن.

سونداي- اق كىتاپ ءاربىر ادامنىڭ بويىنداعى شىعارماشىلىق قابىلەتتى وياتادى. سول سەبەپتى وقىرمان كىتاپقا دەگەن ماحابباتىن، قىزىعۋشىلىعىن جوعالتىپ الماس ءۇشىن بىرنەشە كەڭەس ۇسىنامىز.

1) كىتاپ وقۋدى ادەتكە اينالدىرۋ

كۇنىنە كىتاپ وقۋعا 1 ساعات ارناۋ قاجەت، ال ۋاقىتىڭىز بولماسا كەمىندە 15 مينۋت وقۋ كەرەك. سوندا ميىڭىز تىنىعىپ، سەرگىپ قالاسىز جانە ءسىزدىڭ تۇلعالىق دامۋىڭىزعا ۇلكەن اسەر ەتەدى.

2) كىتاپتى دۇرىس تاڭداۋ

ەڭ الدىمەن كىتاپتى جاس ەرەكشەلىگىنە قاراي تاڭداعان ءجون. وقۋ بارىسىندا جۇيەلىككە اسا ءمان بەرگەن ابزال. باستاۋىش سىنىپ وقۋشىلارى بالالار ادەبيەتىن، ەرتەگى كىتاپتاردى وقىماي تۇرىپ «اباي جولى» نەمەسە «كوشپەندىلەر» سەكىلدى كولەمدى ءارى اۋىر كىتاپتاردى وقىسا، ونى تولىقتاي ءتۇسىنىپ، وزىنە كەرەك دۇنيەنى الا المايدى. سول سەكىلدى جاسوسپىرىم شاعىندا «ماحاببات قىزىق مول جىلداردى» وقىماعان ادام، جاسى ۇلعايعاننان كەيىن قانشا تالپىنسا دا روماننىڭ قىزىعىنا باتا المايدى.

3) نەگىزگى ويلاردى ءتۇرتىپ الۋ

كىتاپتاعى وزىڭىزگە قاجەتتى جەرلەرىن جازىپ الۋ سىزگە پايداسىن تيگىزەدى. ناقىل سوزدەر نەمەسە قاناتتى سوزدەردى جازۋ ارقىلى سىزدە جاڭا ويلار تۋىندايدى، ومىرگە دەگەن كوزقاراسىڭىز وزگەرەدى جانە كىتاپ وقۋعا دەگەن قۇلشىنىسىڭىز ارتا تۇسەدى.

4) تالداۋ جاساۋ

كىتاپتى وقىپ بىتكەننەن كەيىن ءوز ويىڭىزدى جازىپ وتىرىڭىز. ياعني كىتاپتان تۇسىنگەنىڭىزدى، نە تۇيگەنىڭىزدى بايانداۋ. وقىعان كىتاپتان تاجىريبە جيناپ، وزىمىزگە قاجەت قۇندىلىقتاردى الۋ قاجەت. وسى كەڭەستەردى پايدالانا وتىرىپ كىتاپتىڭ قانشالىقتى پايدالى بولعانىن بىلە الامىز.

5) ءبولىسۋ

كىتاپتى وقىپ بولعاننان كەيىن ونى دوستارىڭىزعا، جاقىندارىڭىزعا ۇسىنعان جاقسى. كىتاپ تۋرالى پىكىر الماسىپ، تالقىلاۋ وقىعانىڭىزدى ەستە ساقتاۋعا كومەكتەسەدى.

ساياجان قۇدايبەرگەن، ل. ن. گۋميليەۆ اتىنداعى ە ۇ ۋ ستۋدەنتى.

https://egemen.kz