بيىل ەلىمىزدە ساپاسىز ينتەرنەتكە قاتىستى 5 مىڭنان استام شاعىم تۇسكەن
«بيىلعى 1- ساۋىردەگى مالىمەتكە سۇيەنسەك، قازاقستانداعى حالىق سانى 200 مىڭنان اساتىن 1432 اۋىل كەڭ جولاقتى ءموبيلدى ينتەرنەتكە قوسىلماعان. بۇل رەسمي دەرەك. شىنايى جاعدايعا توقتالساق، عالامتوردى اتىمەن كورمەگەن ەلدى مەكەندەر سانى بۇدان الدەنەشە ەسە كوپ بولۋى مۇمكىن. 2020 -جىلى مەملەكەت قازاقستان رەسپۋبليكاسى حالقىنىڭ %98,7 ىن ينتەرنەت جەلىسىنە كەڭجولاقتى جۇيەمەن قامتاماسسىز ەتتى دەگەندى دە ەل ەستىدى. باسقاسىن بىلاي قويعاندا، باس قالانىڭ ءبىراز جەرىندە ينتەرنەت اۋپىرىمدەپ ارەڭ ىستەيدى»، - دەدى ن. سارسەنعاليەۆ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسيننىڭ اتىنا جولداعان ساۋالىندا.
ونىڭ ايتۋىنشا، ينتەرنەتسىز ەلدى مەكەندەردە قيىندىقتى ۇستازدار مەن وقۋشىلار سەزىنىپ وتىر.
«2023 -جىلدىڭ 4 ايىنىڭ وزىندە قازاقستاندىقتار ساپاسىز ينتەرنەتكە قاتىستى 5 مىڭنان استام ارىز- شاعىم تۇسىرگەن. وسى جەردە زاڭدى ساۋال تۋادى، ساپاسىز ينتەرنەتتى ۇسىنعان وپەراتورلارعا قانشا ايپپۇل سالىندى؟ ءتيىستى مەجەگە جەتۋ ءۇشىن جاۋاپتى مينيسترلىك قانداي قارەكەت قىلىپ جاتىر؟ اتقارىلعان جۇمىستى تۇگەل جوققا شىعارۋدان اۋلاقپىز، بۇگىنگى كۇنگە دەيىن 6290 اۋىلدىڭ 4974 ىنە كەڭ جولاقتى ءموبيلدى ينتەرنەت تارتىلعان. ال قالعان مىڭنان استام ەلدى مەكەندەگى حالىقتىڭ قۇقىعى شەكتەلىپ قالعان جوق پا؟» ، - دەدى دەپۋتات.
وسى رەتتە ول ءتيىستى ۇسىنىستاردى جاريالادى. بىرىنشىدەن، ساپاسىز ينتەرنەت پەن ۇيالى بايلانىسسىز وتىرعان اۋىلدارداعى پروبلەمانى شەشۋ ءۇشىن ۇكىمەتتە ارنايى كوميسسيا قۇرۋدى، ونىڭ قۇرامىنا قوعام بەلسەندىلەرىن، سالا ماماندارىن جانە دەپۋتاتتاردى قوسۋدى سۇرادى.
«مينيسترلىكتىڭ مۇمكىندىكتەرىن پايدالانا وتىرىپ، ۇيالى بايلانىس پەن ينتەرنەتى جوق اۋىل- ايماقتاردىڭ ءتىزىمىن اتىن اتاپ تۇرىپ اشىق جاريالاۋ قاجەت. ينتەرنەتسىز وتىرعان اۋىل- ايماقتاردىڭ تۇرعىندارى ءوزى تۇرىپ جاتقان ەلدى مەكەنگە قاشان، قاي كەزدە عالامتوردىڭ قوسىلاتىنىن ناقتى ءبىلۋى كەرەك. سوندىقتان، مينيسترلىك قوعام الدىندا جاۋاپكەرشىلىك الىپ، قاي جەرگە، قاشان ساپالى ينتەرنەتتىڭ جەتەتىنىن اشىق جاريالاۋى قاجەت»، - دەدى دەپۋتات.
