الماتى وبلىسىنداعى 5 ادامنىڭ ءولىمى: مارقۇمدار نەدەن ۋلانعانى ايتىلدى
«4-مامىر كۇنى ساعات 16:00 شاماسىندا قاراساي اۋدانىنىڭ پوليتسيا بولىمىنە كولاشى اۋىلىندا 6 ادام بەلگىسىز زاتتان ۋلانعانى تۋرالى حابارلاما كەلىپ ءتۇستى. وقيعا سالدارىنان 1984 -جىلعى ەر ادام جانە 2008، 2010، 2013 جانە 2018 -جىلعى ءتورت بالا قايتىس بولدى. 1985 -جىلعى ايەل شامالعان اۋىلىنداعى اۋرۋحاناعا جاتقىزىلدى.
اتالعان دەرەك دەرەۋ اۋداندىق پوليتسيادا تىركەلدى. بولعان وقيعانىڭ بارلىق ءمان-جايىن انىقتاۋ ءۇشىن سوت- مەديتسينالىق ساراپتاما تاعايىندالىپ، بارلىق قاجەتتى تەرگەۋ ارەكەتتەرى جۇرگىزىلىپ جاتىر» دەلىنگەن حابارلامادا.
ايتا كەتەيىك، تەرگەۋدىڭ تولىقتىعى ءۇشىن الماتى وبلىسىنىڭ تجد زەرتتەۋ سىناق ءورت زەرتحاناسى، گاز قىزمەتى جانە س ە ق شاقىرىلدى.
تۇپكىلىكتى شەشىم تاعايىندالعان ساراپتامالىق تەكسەرۋلەردىڭ ناتيجەلەرى بويىنشا قابىلدانادى. الدىن الا مالىمەتتەر بويىنشا، زارداپ شەككەندەر كومىرتەگى توتىعىمەن ۋلانعان.
ايتا كەتەيىك، بۇعان دەيىن بەلگىسىز زاتتان 6 ادامنان تۇراتىن ءبىر وتباسى ۋلانىپ، ونىڭ بەسەۋى كوز جۇمعانىن جازعان ەدىك.
