تۇركىستاندا 5 مىڭ كاۋاپ ءپىسىرىلىپ، كوپشىلىككە تاراتىلدى
تۇركىستاندا «قازاقستان - دوستىق مەكەنى» اتتى مەرەكەلىك ءىس-شارا ءوتتى.
تۇركىستان وبلىسىنىڭ قۇرىلعانىنا 5 جىل تولۋىنا جانە 1- مامىر - قازاقستان حالقىنىڭ بىرلىگى كۇنىنە وراي ۇيىمداستىرىلعان جيىندا كوپشىلىك ەتنومادەني بىرلەستىكتەردىڭ ۇلتتىق تاعامدارى مەن قولونەر كورمەسىن تاماشالادى.
مەرەكەلىك ءىس-شارادا ەلدىڭ رۋحىن كوتەرەتىن اندەر شىرقالدى. قازاقتىڭ ءبي ونەرى دارىپتەلىپ، سۇگىردىڭ تەرمەسى ورىندالدى.
سونىمەن بىرگە باۋىرلاس حالىقتاردىڭ ۇلتتىق اندەرى دە مەرەكەنىڭ اجارىن اشا ءتۇستى.
تايقازان ۇلگىسىندەگى 100 مەترلىك مانگال قۇرىلىپ، وندا 30 اسپاز بىرىگىپ، ءدامى ءتىل ۇيىرەتىن كاۋاپ ءپىسىردى.
جۇرتشىلىق بىرلىك پەن ىنتىماق داستارقانىنان ءدام تاتتى.
دوستىق پەن بىرلىك، ىزگىلىك پەن ەڭبەك ناسيحاتتالعان سالتاناتتى جيىندا تۇركىستان وبلىسىنىڭ اكىمى دارحان ساتىبالدى كوپشىلىكتى مەرەكەمەن قۇتتىقتادى.
«سىزدەردى 1- مامىر - قازاقستان حالقىنىڭ بىرلىگى كۇنى مەرەكەسىمەن شىن جۇرەكتەن قۇتتىقتايمىن! بىرلىك پەن ىنتىماق مەملەكەتىمىزدىڭ تۇراقتى دامۋىنا جول باستايدى. بىرلىكتىڭ ارقاسىندا ەلىمىز الەۋمەتتىك- ەكونوميكالىق جانە ساياسي تۇراقتىلىققا قول جەتكىزە ءبىلدى. بيىل تۇركىستان وبلىسىنىڭ قۇرىلعانىنا 5 جىل تولىپ وتىر. وسى قىسقا عانا ۋاقىتتا وبلىس پەن تۇركىستان قالاسىنىڭ جاڭا ءداۋىرى باستالدى»، دەدى دارحان ساتىبالدى.
مەرەكەلىك كەشتە ءشامشى قالداياقوۆ اتىنداعى وبلىستىق فيلارمونيا ونەرپازدارى جۇرتشىلىقتى ونەرىمەن ءتانتى ەتسە، مەرەكە «تۋعان جەر»، «بىرلىگىمىز جاراسقان» اندەرىمەن تۇيىندەلدى.
