ىشەك ساۋلىعىن قۇرتاتىن ءسىز ويلاماعان 5 ادەت

استانا. قازاقپارات - ىشەكتەر جاعدايىنا تەك اسقورىتۋ پروتسەسى ەمەس، ادامنىڭ سىرت كەلبەتى مەن يممۋنيتەتى بايلانىستى.

بۇل ورگاننىڭ جاقسى جۇمىس ىستەۋىنە قالاي كومەكتەسۋگە بولادى؟ Doctorpiter. ru پورتالىنا ەندوكرينولوگ الەكسەي جيتو جاۋاپ بەردى.

عالىمدار مەن دارىگەرلەر ىشەكتەردى ەڭ مىقتى ورگان دەپ سانايدى. سەبەبى تاماقتان پايدالى زاتتاردى سىڭىرۋمەن قاتار ول يممۋندى جۇيەگە جاۋاپ بەرەدى. اعزاداعى بارلىق يممۋنوكومپەتەنتتى جاسۋشالاردىڭ شامامەن %80 ى ىشەكتەردىڭ شىرىشتى قابىعىندا ورنالاسقان.

ەگەر اسقازان-ىشەك جولىندا بىردەڭە دۇرىس بولماسا، سوزىلمالى اۋرۋلار اسقىنىپ كەتەدى، حال- جاعداي ناشارلايدى جانە تەرىگە بورتپە شىعۋى مۇمكىن.

«ىشەكتەر جۇمىسىنداعى كەز كەلگەن اۋىتقۋلار دەنساۋلىققا قاتىستى قاۋىپتى پروبلەمالارعا اكەلۋى مۇمكىن، سوندىقتان ولاردى ەلەمەۋگە بولمايدى. بۇل ورگان ءبىر رەت جاڭىلىسۋى مۇمكىن، مىسالى، ارتىق تاماقتانعاندا نەمەسە بۇزىلعان تاماق جەگەندە. ەگەر ءىشتىڭ اۋىرۋى، ءىش ءوتۋ، ءىش قاتۋ، ءىش كەبۋ سەكىلدى بەلگىلەر بىرنەشە كۇن بويى مازالاسا، وندا مىندەتتى تۇردە گاستروەنتەرولوگقا قارالۋ كەرەك»، - دەيدى الەكسەي جيتو.

كەي ءبىز ويلاماعان ادەتتەر ىشەكتەر ساۋلىعىنا جاعىمسىز اسەر ەتۋى مۇمكىن. ولارعا مىنالار جاتادى:

1. كۇندە تاڭەرتەڭ اش قارىنعا كوفە ءىشۋ؛

2. ۇندى تاماقتى كوپ جەۋ؛

3. تاماقتى دۇرىس شايناماي جۇتۋ؛

4. تاماقتان سوڭ ۇنەمى گازدالعان سۋسىن نەمەسە ءتاتتى سۋسىن ءىشۋ؛

5. كوپ مولشەردە الكوگول ءىشۋ.

اسقازان-ىشەك جولى جۇمىسى جاقسى جۇمىس ىستەۋ ءۇشىن نە ىستەۋ كەرەك؟

اسقازانىڭىز اۋىرماس ءۇشىن جانە ءىش كەبۋ، ءىشۋ ءوتۋ سەكىلدى باسقا دا اسقازان- ىشەك جولى پروبلەمالارىمەن قينالماس ءۇشىن كەي قاراپايىم ەرەجەلەردى ساقتاۋ كەرەك.

- دۇكەندە ونىمدەردىڭ جارامدىلىق مەرزىمىن تەكسەرۋدى ۇمىتپاڭىز؛

- تاماقتى توڭازىتقىشتا ۇزاق ساقتاماۋعا تىرىسىڭىز. ەگەر تاماقتان جاعىمسىز ءيىس شىعىپ تۇرسا، ونى جەمەڭىز. جالپى، تاماقتى تاۋىسىپ ىشەتىندەي ەتىپ پىسىرگەن دۇرىس. جاڭا پىسكەن تاماقتار ادەتتە جاقسىراق قورىتىلادى؛

- جەمىستەر مەن كوكونىستەردىڭ سىرتىن جاقسىلاپ جۋىڭىز؛

- تاماق ءپىسىرۋ ەرەجەلەرىن ساقتاڭىز: ونىمدەردى شالا پىسىرمەڭىز؛

- ەگەر انتيبيوتيك ءىشىپ جۇرسەڭىز، دارىگەر كەڭەسىن الىپ، پروبيوتيك ءىشىڭىز؛

- ارتىق تاماقتانباڭىز. از-ازدان، ءبىراق ءجيى تاماقتانىڭىز؛

- ۇيىقتار الدىندا تاماق ىشپەڭىز. ۇيىقتارعا 2-3 ساعات قالعاندا تاماقتانىپ الساڭىز، جاقسىراق ۇيىقتايتىن بولاسىز؛

- قاراپايىم گيگيەنا ەرەجەلەرىن ساقتاڭىز. تاماق ىشەر الدىندا مىندەتتى تۇردە قولىڭىزدى سابىنداپ جۋىڭىز.