قازاقستاندىقتار تۇركيا حالقىنا كومەك رەتىندە 5 ميلليون دوللار جينادى
بۇل تۋرالى ەلشىلىكتە وتكەن بريفينگىدە تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي ايتتى، دەپ حابارلايدى قازاقپارات ءتىلشىسى.
«زاتتاي كومەكتەن بولەك، قازاقستان تۇرعىندارى اقشالاي كومەك كورسەتتى. وسى ۋاقىتقا دەيىن جەر سىلكىنىسىنەن زارداپ شەككەندەرگە ارنايى اشىلعان رەسمي شوتقا شامامەن 5 ميلليون دوللار اقشا ءتۇستى»، - دەدى ۋفۋك ەكيدجي.
سونىمەن قوسا، ەلشى قازاقستان ۇكىمەتى 1 ميلليون دوللار قارجىلاي قولداۋ كورسەتكەنىن اتاپ ءوتىپ، بارشا قازاقستاندىقتارعا العىسىن ءبىلدىردى.
ەسكە سالايىق، 6-اقپاندا كاحرامانماراشتا ماگنيتۋداسى 7 بالدان اساتىن ەكى جەر سىلكىنىسى بولدى. جەراستى دۇمپۋلەرى ەلدىڭ 10 پروۆينتسياسىندا، سونداي- اق كورشىلەس مەملەكەتتەردە، سونىڭ ىشىندە سيريادا دا سەزىلدى.
پرەزيدەنت رەجەپ تايىپ ەردوعان تابيعي اپات قۇرباندارىنا بايلانىستى تۇركيادا جەتى كۇندىك ۇلتتىق ازا تۇتۋ جاريالادى.
