قازاقستاننىڭ 5 قالاسىنداعى پرەزيدەنت رەزيدەنتسياسى بالالاردىڭ قاجەتىنە بەرىلەدى
اقپاراتتى وبلىستىق اكىمدىكتەر راستادى، - دەپ حابارلايدى Massaget.kz ءتىلشىسى.
بۇعان دەيىن جەلىدە مەملەكەت باسشىسىنىڭ بەس قالاداعى رەزيدەنتسيالارى بالالاردىڭ يگىلىگىنە بەرىلەتىنى تۋرالى اقپارات پايدا بولدى، ال جەرگىلىكتى اكىمدىكتەر بۇل عيماراتتاردى بالاباقشا نە ساۋىقتىرۋ ورتالىقتارى نە بالالارعا ارنالعان باسقا دا ورتالىقتار ەتە مە، مۇنى ءوزى شەشەدى.
«مەملەكەت باسشىسىنىڭ تاپسىرماسى ورىندالادى. قازىرگى ۋاقىتتا بەرۋ مەحانيزمى جانە قوناق ءۇيدى ماقساتتى پايدالانۋ ماسەلەسى پىسىقتالىپ جاتىر. شەشىمدى قوسىمشا حابارلايمىز»، - دەپ حابارلادى قوستاناي وبلىسىنىڭ اكىمدىگى.
سونىمەن بىرگە اقپاراتتى ماڭعىستاۋ وبلىسىنىڭ اكىمدىگى دە راستادى.
«راستايمىز. بۇل بويىنشا جۇمىس باستالادى. قوسىمشا اقپارات ءسال كەيىنىرەك بەرىلەدى»، - دەپ حابارلادى اكىمنىڭ باسپا ءسوز قىزمەتى.
اتىراۋ وبلىسى اكىمدىگى دە بۇل عيمارات بالالارعا ارنالعان مەكەمە رەتىندە پايدالانۋعا بەرىلەتىنىن حابارلادى.
«بولاشاقتا بۇل دەمالىس جانە ساۋىقتىرۋ ورتالىعىنا اينالادى. تيىسىنشە، تاعايىنداۋدى انىقتاعاننان كەيىن قايتا جابدىقتاۋ بويىنشا ۇيىمداستىرۋ جۇمىستارى باستالادى»، - دەدى اكىمدىكتىڭ باسپا ءسوز قىزمەتى.
اقتوبە وبلىسى اكىمى اپپاراتى باسشىسىنىڭ ورىنباسارى ەرجان بايتانايەۆتىڭ حابارىنا قاراعاندا، بۇل عيمارات بولاشاقتا بالاباقشا، ءبىلىم بەرۋ ورتالىعى، لاگەر نەمەسە وڭالتۋ ورتالىعى بولۋى مۇمكىن.
«ءارى قاراي ءبىز نىساندى بالالارعا قاجەت نارسەنىڭ بارىمەن جابدىقتايمىز. قىسقا مەرزىمدە تاپسىرمانى ورىندايمىز»، - دەدى وبلىس اكىمى اپپاراتى باسشىسىنىڭ ورىنباسارى ەرجان بايتانايەۆ.
جامبىل وبلىسى اكىمىنىڭ ورىنباسارى ەركىن ۇيسىمبايەۆتىڭ سوزىنشە، پرەزيدەنت رەزيدەنتسياسى مۇگەدەك بالالارعا ارنالعان ساناتوري نەمەسە جازعى لاگەر بولادى. بۇل تۋرالى ناقتى شەشىم كەيىنىرەك قابىلدانادى.