راقىمشىلىق: 5 كۇدىكتىگە قاتىستى قىلمىستىق قۋدالاۋ توقتاتىلدى

«الدىن الا مالىمەتتەرگە سايكەس، راقىمشىلىق شاراسىمەن شامامەن 1,5 مىڭعا جۋىق ادام قامتىلماق. باس پروكۋراتۋرا جەرگىلىكتى پروكۋرورلارعا «راقىمشىلىق جاساۋ» زاڭىنىڭ نورمالارىن بىركەلكى قولدانىلۋىن جانە قاتاڭ زاڭدىلىقتى ساقتاۋدى قامتاماسىز ەتۋ تۋرالى تاپسىرما بەرىلدى»، - دەدى ە. قيلىمجانوۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، قازىرگى كەزدە جازانى ورىندايتىن ورگاندار 878 سوتتالعانعا قاتىستى سوتتارعا قاماۋ مەرزىمىن قىسقارتۋ جانە جازادان بوساتۋ تۋرالى ۇسىنىستار جولدادى.

«تەرگەۋ ورگاندارى سوتقا دەيىنگى تەرگەپ-تەكسەرۋ بارىسىندا ورتا دارەجەلى قىلمىستى جاساعان 5 كۇدىكتىگە قاتىستى قىلمىستىق قۋدالاۋدى توقتاتتى. قالعاندارى اۋىر جانە اسا اۋىر قىلمىستاردى جاساعان، ولارعا راقىمشىلىق سوت تارتىبىمەن قولدانىلاتىن بولادى»، - دەدى باس پروكۋراتۋرا وكىلى.

وسى ورايدا ولارعا قاتىستى بەرىلگەن جازالاردىڭ مەرزىمى قايتا قارالماق.

بۇدان بۇرىن حابارلانعانداي، بيىل 2- قاراشادا مەملەكەت باسشىسى «راقىمشىلىق جاساۋ تۋرالى» قازاقستان رەسپۋبليكاسىنىڭ زاڭىنا قول قويدى.