بيىل پيلوتتىق رەجيمدە 5 ءتۇرلى جاردەماقى تاعايىندالادى
سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى Smart Data Ukimet مەملەكەتتىك پلاتفورماسىن دامىتۋ اياسىندا الەۋمەتتىك قولداۋ شارالارىن پرواكتيۆتى تۇردە تاعايىنداۋ ءۇشىن «وتباسىنىڭ سيفرلىق كارتاسى» اقپارات جۇيەسى ازىرلەنگەنىن ايتتى.
ەلىمىزدىڭ بارلىق ازاماتتارى جۇيەدە 5,9 ميلليون وتباسىنا، ەكونوميكالىق، الەۋمەتتىك جانە تۇرعىن ءۇي جاعدايلارى، دەنساۋلىق كورسەتكىشتەرى مەن ءبىلىمى بويىنشا 5 ساناتقا بولىنگەن. وسى مالىمەتتەر نەگىزىندە قاجەتتى قولداۋ شارالارى انىقتالادى، سودان كەيىن ازاماتتارعا ولاردى قابىلداۋ تۋرالى SMS- حابارلاما جىبەرىلەدى.
وسىلايشا، 2022-جىلعى 1- قىركۇيەكتەن باستاپ پيلوتتىق رەجيمدە 5 ءتۇرلى جاردەماقى: بالا تۋۋ جانە ونىڭ كۇتىمى، مۇگەدەكتىگى بار بالانىڭ كۇتىمى، جۇمىسسىزدىق جانە مۇگەدەكتىك بويىنشا جاردەماقىلار تاعايىندالادى. جىل سوڭىنا دەيىن تاعى 5 قىزمەتتى قوسۋ جوسپارلانىپ وتىر: اسىراۋشىسىنان ايىرىلۋ بويىنشا الەۋمەتتىك تولەم، كوپبالالى انالارعا جاردەماقى، ا ا ك، كۇمىس نەمەسە التىن القامەن ماراپاتتالعاندارعا جاردەماقى، سونداي-اق زەينەتاقى تولەمدەرى.
پرەمەر-مينيستر جۇرگىزىلىپ جاتقان جۇمىستى قولداپ، مالىمەتتەردى ءتيىمدى تالداۋ جانە حالىققا مەملەكەتتىك قىزمەت كورسەتۋ ساپاسىن ارتتىرۋ ءۇشىن ءبىرىڭعاي پلاتفورما بازاسىندا مەملەكەتتىك ورگاندار مەن كۆازيمەملەكەتتىك كومپانيالاردىڭ اقپاراتتىق جۇيەلەرىنىڭ ينتەگراتسياسىن جانداندىرۋدى تاپسىردى.
سونىمەن قاتار دەنساۋلىق ساقتاۋ مينيسترلىگىنىڭ، ۆەدومستۆوعا قاراستى جانە مەديتسينالىق ۇيىمدارىنىڭ بارلىق اقپاراتتىق جۇيەلەرىن بىرىكتىرەتىن eHealth ەلەكتروندىق دەنساۋلىق ساقتاۋ ارحيتەكتۋراسىن دامىتۋ ماسەلەلەرى تالقىلاندى. بۇل ازاماتتاردىڭ ۇلتتىق ەلەكتروندىق دەنساۋلىق پاسپورتىن تولىققاندى قالىپتاستىرۋعا ىقپال ەتىپ، ءاربىر ناقتى ادامنىڭ قاجەتتىلىگىنە باعدارلانعان مەديتسينالىق كومەكتىڭ ساپاسى مەن قولجەتىمدىلىگىن ارتتىرۋدى، سونداي-اق جالپى پاتسيەنتتەردىڭ دەنساۋلىق جاعدايىن ۇزدىكسىز باقىلاۋعا كوشۋدى قامتاماسىز ەتەدى.
سونداي-اق وتىرىستا بەسىنشى بۋىنداعى 5G/IMT ۇيالى بايلانىس ستاندارتىن ەنگىزۋ ماسەلەسى قارالدى. جاقىن ارادا ءتيىستى راديوجيىلىكتەردى ءبولۋ بويىنشا اشىق اۋكتسيون وتكىزىلەدى. سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتتەرى بويىنشا، باسەكەلەستىك جاعدايلاردى قامتاماسىز ەتۋ ماقساتىندا وعان 100 گە جۋىق كومپانيا قاتىسا الادى.
