قورعالجىڭ قورىعىندا 5 مىڭعا جۋىق قوقيقاز ۆيدەوعا ءىلىندى
«قازاقستاننىڭ بيولوگيالىق الۋانتۇرلىلىكتى ساقتاۋ قاۋىمداستىعىنىڭ قىزمەتكەرلەرى قورعالجىڭ قورىعىنىڭ ساۋمالكول كولىنەن شامامەن 5 مىڭ قوقيقازدى بايقادى. ۆيدەودان قوقيقازبەن قاتار، قازاقستاننىڭ قىزىل كىتابىنا ەنگەن سۇڭقىلداق اققۋ مەن اقباس ۇيرەكتى دە بايقاۋعا بولادى. سونىمەن قاتار جاعالاۋدان وبەكتيۆكە ىلىنبەي قالعان شامامەن 500 اقباس تىرنا كوزگە ءتۇستى»، - دەلىنگەن قاۋىمداستىقتىڭ Instagram-پاراقشاسىندا جاريالانعان ۆيدەو سيپاتتاماسىندا.
مامانداردىڭ ايتۋىنا قاراعاندا، جىلدا وسى مەزگىلدە قورعالجىڭ قورىعىنا ءالۋان ءتۇرلى قۇستار ۇشىپ كەلەدى.
«كوكتەمدە ەرىگەن قار سۋ مول بولىپ، كولدىڭ دەڭگەيى كوتەرىلەدى. ال جازدا سۋ دەڭگەيى تومەندەپ، ءارتۇرلى قۇستار، ونىڭ ىشىندە قوقيقاز دا ۇشىپ كەلەدى. تاياز كولدە سۋ تەز جىلىنىپ، قۇستار قورەكتەنەتىن بالدىر مەن باسقا دا جاندىكتەر جىلدام كوبەيەدى»، - دەپ اتاپ وتەدى قازاقستاننىڭ بيولوگيالىق الۋانتۇرلىلىكتى ساقتاۋ قاۋىمداستىعىنان.
