قىزىلوردادا تۇرمەگە ترامادول مەن 5 تەلەفون لاقتىرماق بولعان ادام ۇستالدى
قىزىلوردا. قازاقپارات - قىزىلوردادا قىلمىستىق- اتقارۋ جۇيەسى دەپارتامەنتىنە قاراستى ز ك-169/5 مەكەمەسىنىڭ قورشاۋىنان سكوتچپەن ورالعان 2 دانا بەلگىسىز زاتتى لاقتىرۋعا ارەكەتتەنگەن قىزىلوردالىق تۇرعىن قولعا ءتۇستى، دەپ حابارلايدى قازاقپارات ءتىلشىسى.
بۇل جونىندە جەدەل تۇردە 102 نومىرىنە حابارلاندى. اتالعان مەكەمەگە قىزىلوردا قالالىق پوليتسيا باسقارماسىنىڭ جەدەل- تەرگەۋ توبى مەن ۋچاسكەلىك پوليتسيا ينسپەكتورى جەدەل جەتتى.
«تەكسەرۋ بارىسىندا ىشىنەن 100 دانا ترامادول ءدارىسى مەن بەس تەلەفون، ەكى قۋاتتاعىش قۇرىلعى تابىلدى. قازىرگى تاڭدا اتالعان دەرەك بويىنشا ق ر اكىمشىلىك قۇقىق بۇزۋ تۋرالى كودەكسىنىڭ 481-بابىنا سايكەس ءىس ماتەريالدارى پروتسەسسۋالدىق شەشىم قابىلداۋ ءۇشىن قىزىلوردا قالالىق اكىمشىلىك سوتىنا جولداندى. وندا قىلمىستىق- اتقارۋ جۇيەسىنىڭ مەكەمەلەرىندە، ارناۋلى مەكەمەلەردە ۇستالاتىن ادامدارعا تىيىم سالىنعان زاتتار، بۇيىمدار مەن نارسەلەر بەرۋ جاعدايى كورسەتىلگەن»، - دەدى مەكەمە باستىعى ماقسۇت وتەتىلەۋوۆ.
ۆەدومستۆو مالىمەتىنشە، دەپارتامەنت تاراپىنان سوتتالعانداردىڭ پايدالانۋى مەن قولدانىلۋىنا تىيىم سالىنعان زاتتاردىڭ جولىن كەسۋ جۇمىسى قاتاڭ باقىلاۋدا تۇر.
«جىل باسىنان وسىنداي سەگىز دەرەك تىركەلدى. ونىڭ 2-نە قىلمىستىق ءىس قوزعالسا، 6 دەرەك بويىنشا سوت قاۋلىسىمەن ەسكەرتۋ جاسالدى»، - دەدى ماقسۇت وتەتىلەۋوۆ.
ەسكە سالساق، بۇدان بۇرىن قىزىلوردادا ادام پىشاقتاعان جىگىت ەلوردادا ۇستالعان ەدى.
