قازاقستاندىقتار ءجيى قونىس اۋداراتىن 5 مەملەكەت قانداي

نۇر-سۇلتان. قازاقپارات - قازاقستاننان كوشىپ كەتۋشىلەر ازايعانىمەن، ءالى دە تەرىس سالدو ساقتالىپ وتىر.

Ranking.kz رەسۋرسى وسىنداي تاقىرىپپەن ماتەريال جاريالادى، دەپ حابارلايدى قازاقپارات ءتىلشىسى.

«جىلدىڭ ءبىرىنشى توقسانىندا قازاقستانعا 4,1 مىڭنان استام ادام كوشىپ كەلگەن. بۇل بىلتىرعى كەزەڭنەن ەكى ەسە كوپ. دەگەنمەن 3 ايدا 5,3 مىڭ ادام كوشىپ كەتكەن. بۇل بىلتىرعى كەزەڭمەن سالىستىرعاندا %4,3 عا از. قازاقستاننان كوشىپ كەتۋشىلەر سانى كەيىنگى ەكى جىل قاتارىنان ازايىپ كەلەدى»، - دەپ جازىلعان ماتەريالدا.

وڭىرلەر اراسىندا قاراعاندى وبلىسىنان ەڭ كوپ ادام شەتەلگە كوشكەن - 681 تۇرعىن. ودان كەيىنگى ورىنداعى قوستاناي وبلىسىنان 645 ادام، پاۆلودار وبلىسىنان 643 ادام تۇرعىلىقتى ەلىن اۋىستىرعان.

«العاشقى توقساندا كوشىپ كەلۋشىلەردىڭ ەڭ كوپ سانى ماڭعىستاۋ وبلىسىندا تىركەلدى - 1,3 مىڭ ادام. بىلتىرعى كەزەڭمەن سالىستىرعان 3,5 ەسە كوپ. ۇزدىكتەر ۇشتىگىنە الماتى قالاسى (595 ادام) مەن الماتى وبلىسى (401 ادام) ەندى. ەلدەن كەتكەندەردىڭ ەڭ كوپ بولىگى رەسەي فەدەراتسياسىن تاڭداعان - 4,1 مىڭ ادام (بىلتىرعىدان %7 از). سونداي-اق، 617 ادام گەرمانياعا، 125 ادام پولشاعا، 89 ادام ا ق ش-قا، 57 ادام بەلارۋسكە قونىس اۋداردى»، - دەپ جازادى Ranking.kz.

ال ەلگە كەلۋشىلەردىڭ نەگىزگى كوشى وزبەكستاننان باعىت الىپتى - 2 مىڭنان استام ادام. ءبىر جىل بۇرىن ولاردىڭ سانى 500 دىڭ اينالاسىندا عانا بولعان. ەكىنشى ورىندا رەسەي فەدەراتسياسىنان كەلگەندەر تۇر.

Ranking.kz-تىڭ مالىمەتىنشە، العاشقى 3 ايدا ەلگە 810 رەسەيلىك كوشىپ كەلگەن. العاشقى بەستىكتە تۇركىمەنستان، قىرعىز رەسپۋبليكاسى جانە قىتاي بار. بۇعان دەيىن استانا پوليتسەيلەرى 27-ماۋسىمى مەن 4-شىلدە ارالىعىندا عانا كوشى-قون زاڭناماسىن بۇزعان 98 شەتەل ازاماتىن ەلدەن شىعارعانىن حابارلاعان ەدى.