ءۇش جىل بۇرىنعى ۇشاق اپاتى: الماتى وبلىسىندا 5 شەنەۋنىك سوتتالدى

تالعار. قازاقپارات - الماتى وبلىسىنا قاراستى تالعار اۋدانىندا بۇرىن اكىمدىكتە ىستەگەن ءبىرقاتار لاۋازىمدى تۇلعا سوتتالدى، دەپ حابارلايدى قازاقپارات ءتىلشىسى.

ءىس ماتەريالدارىنا سايكەس، 2017-2019 -جىلدارى سوتتالۋشىلار قىزىلتۋ اۋىلىنان تىس جەردەگى مەملەكەت مەنشىگىندەگى بوس جەرلەردى يەلىكتەن زاڭسىز شىعارعان. شەنەۋنىكتەر بۇل ارەكەتى ارقىلى جەكە باس بايلىعىن كوزدەگەن.

تالعار اۋدانى سوتىنىڭ 2022 -جىلعى 10-ماۋسىمداعى ۇكىمىمەن:

- تالعار اۋدانى اكىمدىگى ساۋلەت جانە قالا قۇرىلىسى ءبولىمىنىڭ بۇرىنعى باستىعى مارات رىسپەكوۆ 6 جىلعا؛

- تالعار اۋدانى اكىمدىگى جەر قاتىناستارى ءبولىمىنىڭ بۇرىنعى باستىعى ماقسات تىنىباي 6 جىل 3 ايعا؛

- پانفيلوۆ اۋىلدىق وكرۋگىنىڭ بۇرىنعى اكىمى نۇرعالي اپپازوۆ 8 جىلعا؛

- پانفيلوۆ اۋىلدىق وكرۋگى اكىمىنىڭ بۇرىنعى ورىنباسارى قۇرمانحان گاليەۆا 5 جىلعا باس بوستاندىعىنان ايىرىلدى.

ال تالعار اۋدانى اكىمدىگى جەر قاتىناستارى ءبولىمى باستىعىنىڭ مىندەتىن اتقارعان ماديار قادىرجان تاۋەلسىزدىكتىڭ 30 جىلدىعىنا وراي جاريالانعان راقىمشىلىق اياسىندا باس بوستاندىعىنان ايىرۋ تۇرىندەگى نەگىزگى جازادان بوساتىلدى.

بارلىق سوتتالعاندار ەندى مەملەكەتتىك قىزمەتتە جۇمىس ىستەي المايدى.

ەسكە سالايىق، 2019 -جىلدىڭ 27-جەلتوقسانىندا Bek Air اۋە كومپانياسىنىڭ ۇشاعى بەتون دۋالعا قۇلاپ، الماتى ماڭىنداعى جەكە ءۇيدى قاعىپ كەتكەن بولاتىن. بورتتا 93 جولاۋشى جانە بەس ەكيپاج مۇشەسى بولعان. سودان كەيىن ۇشاق اپاتىنان 12 ادام قايتىس بولدى، 69 ادام جاراقات الدى.

2020 -جىلى الماتى وبلىسى بويىنشا سىبايلاس جەمقورلىققا قارسى قىزمەت قىلمىستىق ءىستى تەرگەۋمەن قاتار تالعار اۋدانى اكىمدىگىنىڭ شەنەۋنىكتەرىنە قاتىستى جەر ۋچاسكەلەرىن زاڭسىز بەرۋگە جانە جەر ۋچاسكەلەرىنىڭ نىسانالى ماقساتىن زاڭسىز وزگەرتۋگە بايلانىستى ەكىنشى قىلمىستىق ءىس اشتى.

اۆتور: سامال قابىشەۆا