جىل سوڭىنا قاراي قازاقستاننىڭ ءۇش قالاسىندا 5-بۋىن جەلىسى ىسكە قوسىلادى

نۇر- سۇلتان. قازاقپارات – ق ر سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى 5G جەلىسىن ىسكە قوسۋ جايىنداعى جوسپارلارىمەن ءبولىستى، دەپ حابارلايدى قازاقپارات ءتىلشىسى.

«مينيسترلىك قازاقستان رەسپۋبليكاسى اۋماقتىق پرينتسيپ نەگىزىندە راديوجيىلىك سپەكتر (بۇدان ءارى – ر ج س) تاراتۋ بولىگىندە 5G جەلىسىن ەنگىزۋ ستراتەگياسىن ازىرلەدى. ۇزدىكسىز 100 م گ ت س جولاعىن ءبولۋ مۇمكىندىگى بار 3,6 - 3,9 گ گ تس دياپازونىنداعى جيىلىكتەر بەلگىلەندى. سونداي- اق، قازاقستاندا 5G تەحنولوگياسىن ەنگىزۋ جانە ىسكە اسىرۋ مەرزىمدەرى بەلگىلەنگەن»، - دەپ جاۋاپ بەردى ۆەدومستۆو رەداكسيا ساۋالىنا.

ۇسىنىلعان مالىمەتكە سايكەس، بۇگىندە بايلانىس وپەراتورلارى كەلەسى جۇمىستاردى اتقاردى: «قازاق تەلەكوم» ا ق نۇر- سۇلتان قالاسىندا «Astana Hub» IT ستارتاپتار حالىقارالىق تەحنوپاركى» اۋماعىندا پيلوتتىق 5G جەلىسىن ىسكە قوستى. شىمكەنت قالاسىندا بازالىق ستانسيانى ورناتۋ ورنى انىقتالدى، 5G تەحنولوگياسىنىڭ سىناقتارى تەحنيكالىق ەنگىزۋ ساتىسىندا.

«موبايل تەلەكوم- سەرۆيس» ج ش س پيلوتتىق 5G جەلىسىن الماتى قالاسىنداعى ءۇش جەردە ىسكە قوسقان. ولار - «قايسار پلازا» ساۋدا- كەڭسە ورتالىعى (جەلتوقسان، 115)، پانفيلوۆ كوشەسى (اباي اتىنداعى ماوبت- تان تولە بي كوشەسىنە دەيىن) جانە «مەدەۋ» بيىك تاۋلى سپورت كەشەنى. «كسەلل» ا ق الماتى قالاسىنىڭ اربات اۋدانىندا (نۇرسۇلتان نازاربايەۆ پەن جىبەك جولى داڭعىلدارىنىڭ قيىلىسى) 5G تەحنولوگياسىن تەستىلەۋدى ىسكە قوستى. «كار- تەل» ج ش س الماتى قالاسىندا NARXOZ University (جاندوسوۆ ك- ءسى، 55) جانە «گراند الاتاۋ» بيزنەس ورتالىعى (تيميريازيەۆ ك- ءسى، 28ۆ) اۋداندارىندا 5G تەحنولوگياسىن تەستىلىك رەجيمنەن وتكىزە باستاعان.

«قازاقستاندا 5G جەلىسىن 2022 -جىلدىڭ سوڭىنا قاراي رەسپۋبليكالىق ماڭىزى بار قالالار - نۇر- سۇلتان، الماتى، شىمكەنتتە، ال 2023-2025 -جىلدارى وبلىس ورتالىقتارىندا ىسكە قوسۋ جوسپارلانىپ وتىر»، - دەپ تولىقتىردى ۆەدومستۆودان.

اۆتور: زارينا تۋعانبايەۆا