الەۋمەتتىك جەلىنى شۋلاتقان 5 جاسار اۆتوينسپەكتورعا پوليتسەيلەر سىيلىق بەردى
مەرەكەلىك دەمالىس كۇندەرى بالا ءتارتىپ ساقشىسى فورماسىن كيىپ، بىرنەشە ساعاتقا جول قوزعالىسىن رەتتەۋشىگە اينالدى، دەپ حابارلايدى قازاقپارات ءتىلشىسى.
23-ناۋرىزدا Instagram الەۋمەتتىك جەلىسىندە بەينەروليك جاريالاندى. وندا پوليتسيا كيىمىن كيگەن كىشكەنتاي بالا جول جيەگىندە تۇرىپ، شەت اۋدانى اقسۋ- ايۋلى اۋىلى كوشەلەرىنىڭ بىرىندە جول قوزعالىسىن رەتتەگەنىن كورۋگە بولادى. پوليتسەيلەر جاس اۆتوينسپەكتوردىڭ كىم ەكەنىن انىقتادى. ول باستاۋىش سىنىپتا وقيتىن 5 جاسار باعداۋلەت اعزاموۆ بولىپ شىقتى. بالانىڭ اكەسى باعداۋلەتتىڭ ءۇش جاسىنان باستاپ پوليتسيا قىزمەتكەرى بولۋدى ارمانداعانىن ايتتى. ەڭ قىزىعى ءبۇلدىرشىننىڭ اتا- اناسى قۇقىق قورعاۋ ورگاندارىنا قاتىسىمىز جوق دەيدى. ولار اۋدان ورتالىعىندا ءوز ءىسىن دوڭگەلەتىپ جۇرگەن كاسىپكەرلەر.
23-ناۋرىزدا اكەسى ۇلىنا پوليتسيا قىزمەتكەرىنىڭ فورماسىن ساتىپ العان بەتتە، بالا ءوز ارمانىنا ءبىر قادام جاقىندانعانىنا قۋانعان ەكەن. باعداۋلەت بىردەن جاڭا فورماسىن كيىپ، كوشەگە شىققان. اكەسى دۇكەندە بولعان كەزدە، بالا جول جيەگىنە تۇرىپ، اۋا- رايىنىڭ قولايسىزدىعىنا بايلانىستى بارلىق جولدار جابىلعانىن جۇرگىزۋشىلەرگە ەسكەرتكەن. پوليتسيا قىزمەتكەرلەرى ەرىكتى كومەكشىنى نازاردان تىس قالدىرا المادى. قاراعاندى وبلىسى پ د شەت اۋدانى پب باستىعى ماديار مەنىسوۆ اعزاموۆتار وتباسىنا ارنايى بارعان. ول باعداۋلەتتى ەكسكۋرسياعا شاقىرىپ، بالانى قىزمەتتىك اۆتوكولىكپەن الماتى- ەكاتەرينبۋرگ جولىندا قىزمەت اتقارعان پاترۋلگە الىپ كەلگەن، سودان كەيىن وعان پوليتسيا ءبولىمىن كورسەتتى. مۇندا بالاعا ەستەلىك سىيلىقتار تابىس ەتىلدى.
«بولاشاقتا تەك ساتتىلىك تىلەيمىن! ارينە، سەنىڭ پوليتسەي بولۋ ارمانىڭ جۇزەگە اسۋىنا تىلەكتەسپىز»، - دەپ شەت اۋدانى پ ب باستىعى باعداۋلەتكە باتاسىن بەردى.
