پاراليمپيادا قولا جۇلدەگەرىنە پەتروپاۆلدا پاتەر كىلتى مەن 5 ميلليون تەڭگە تابىستالدى
قۇمار اقساقالوۆ كەزدەسۋدىڭ باستى كەيىپكەرى، پاراليمپيادا جۇلدەگەرى الەكساندر گەرليتسكە ءبىر بولمەلى پاتەردىڭ كىلتىن جانە 5 ميلليون تەڭگەنىڭ سەرتيفيكاتىن تابىس ەتتى.
«ءبىز سپورتشىلاردىڭ جارىسىن كورىپ، ەلەڭدەپ وتىردىق. الەكساندر گەرليتس ءۇمىتىمىزدى اقتاپ، الەمنىڭ مىقتى سپورتشىلارىنىڭ ءبىرى ەكەنىن دالەلدەدى. ولار ەربول حاميتوۆپەن بىرگە كوماندالىق ەستافەتادا بەسىنشى ورىننان كورىندى. سىزدەرگە وسى جەڭىستەرىڭىز ءۇشىن العىسىمدى بىلدىرەمىن، جاس سپورتشىلارعا، قيىن جاعدايعا تاپ بولعان جاندارعا ۇلگى كورسەتتىڭىزدەر»، - دەدى قۇمار اقساقالوۆ.
وليمپيادا جانە پاراليمپياداعا قاتىسقان باسقا سپورتشىلار دا ماراپاتسىز قالمادى. ولارعا ءوڭىر باسشىسى قۇرمەت گراموتالارىن، العىس حاتتاردى جانە اقشالاي سەرتيفيكاتتار تابىس ەتتى.
ەستەرىڭىزگە سالايىق، الەكساندر گەرليتس بەيجىڭدە وتكەن پاراليمپيادادا قازاقستان قورجىنىنا جالعىز مەدال سالعان ەدى.
ول پارابياتلوننان سىنعا ءتۇسىپ، ءۇشىنشى بولىپ كەلدى. بۇدان باسقا سپورتشى پارابياتلون جانە پاراشاڭعى جارىسىندا، ەستافەتادا ءۇش رەت بەسىنشى ورىننان كورىندى. جالپى ەلىمىزدەن بۇل ويىندارعا 5 سپورتشى قاتىستى.
