سولتۇستىك قازاقستاندا جاس قىزدى زورلاعان 5 ادامعا ۇكىم شىقتى
س ق و قىلمىستىق ىستەر جونىندەگى مامانداندىرىلعان اۋدانارالىق سوتىنىڭ مالىمەتىنشە، بىلتىر 11 ماۋسىمدا پەتروپاۆلداعى دەمالىس ورىندارىنىڭ بىرىندە 5 جىگىت كامەلەتكە تولماعان قىزدى زورلاپ، سەكسۋالدىق سيپاتتاعى زورلىق-زومبىلىق جاساعان. قىلمىسكەرلەردىڭ ۇشەۋى سول كەزدە ماس بولعان. سوتتالۋشىلاردىڭ كىناسى جابىرلەنۋشىنىڭ، كۋاگەرلەردىڭ ايعاقتارىمەن، ساراپتاما قورىتىندىلارىمەن جانە باسقا دا دالەلدەمەلەرمەن انىقتالدى. پروكۋرور ر. ، س. جانە ب. -نى 16 جىلعا باس بوستاندىعىنان ايىرۋدى، م. جانە ي. -گە قاتىستى 10 جىل باس بوستاندىعىنان ايىرۋ جازاسىن تاعايىنداۋدى سۇرادى. جابىرلەنۋشىنىڭ زاڭدى وكىلى پروكۋروردىڭ ۇستانىمىن قولدادى. جالپى قىلمىستىڭ بۇل تۇرىنە 15 جىلدان 17 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن. سوتتالۋشىلار ءوز كىناسىن مويىندامادى جانە ولاردى اقتاۋدى سۇرادى. سوت ماس كۇيدە قىلمىس جاساۋدى اۋىرلاتاتىن جاعداي دەپ تانىدى، ي. مەن م. -نىڭ كامەلەت جاسىنا تولماعانىن ەسەپكە الىپ، جازانى جەڭىلدەتتى. سوت ر.، ب. جانە س. -نى 16 جىلعا باس بوستاندىعىنان ايىردى.
ولارعا پەداگوگيكالىق لاۋازىمداردى جانە كامەلەتكە تولماعاندارمەن جۇمىس ىستەۋگە بايلانىستى لاۋازىمداردى اتقارۋعا ءومىر بويىنا تىيىم سالىندى. ال م. مەن ي. -گە كامەلەتكە تولماعانداردى باس بوستاندىعىنان ايىرۋدىڭ ەڭ جوعارى مەرزىمى - 10 جىل بەرىلدى. سونداي-اق ولار پەداگوگيكالىق لاۋازىمداردى جانە كامەلەتكە تولماعاندارمەن جۇمىس ىستەۋگە بايلانىستى لاۋازىمداردى اتقارۋ قۇقىعىنان 2 جىل مەرزىمگە ايىرىلدى. سوت جابىرلەنۋشى قىزدىڭ ازاماتتىق تالاپ-ارىزىن تولىق قاناعاتتاندىرىپ، سوتتالۋشىلاردان مورالدىق زيان رەتىندە 10 ميلليون تەڭگە ءوندىرىپ الىناتىن بولدى.