وزبەكستان 5 مىڭنان استام ازاماتىن ۋكراينادان ەۆاكۋاتسيالادى
بۇل تۋرالى وزبەكستان س ءى م رەسمي وكىلى يۋسۋپ كابۋلجانوۆ ءمالىم ەتتى، دەپ حابارلايدى قازاقپارات مەنشىكتى ءتىلشىسى.
«28 - اقپاننان 9 - ناۋرىزعا دەيىنگى ارالىقتا Uzbekistan Airways پولشا ارقىلى 22 اۋە رەيسى ۋكرايناداعى اسكەري قاقتىعىس بولىپ جاتقان ايماقتان 5037 وزبەكستان ازاماتىن ەۆاكۋاتسيالادى»، - دەدى ديپلومات.
ونىڭ ايتۋىنشا، ۋكراينانىڭ ءارتۇرلى بولىگىندەگى ازاماتتاردى شىعارۋ جۇمىستارى ءجۇرىپ جاتىر. سونداي- اق مولدوۆا ارقىلى وزبەكستاندىقتاردى ەۆاكۋاتسيالاۋ ماسەلەسى قارالىپ جاتىر.
«ۋكرايناداعى ءبىزدىڭ ەلدىڭ ەلشىلىگى سۋما قالاسىنان 23 وزبەكستاندىق ستۋدەنتتى حالىقارالىق گۋمانيتارلىق ۇيىمداردىڭ كومەگىمەن ەۆاكۋاتسيالادى. ولار ديپميسسيا جالعا العان اۆتوبۋسپەن لۆوۆ قالاسىنا كەتىپ بارا جاتىر»، - دەپ اتاپ ءوتتى س ءى م وكىلى.
اۆتور: اقبوپە ءابدراسۋل