الماتى وبلىسىندا قازا بولعان پوليتسەيلەردىڭ وتباسىنا 5 ميلليون تەڭگەدەن بەرىلەدى
كەشە وبلىس اكىمى قانات بوزىمبايەۆ وڭىردەگى پوليتسيا قىزمەتكەرلەرىمەن كەزدەسىپ، ولارعا العىسىن جەتكىزدى. كەزدەسۋ بارىسىندا ق. بوزىمبايەۆ پرەزيدەنت تاپسىرماسىمەن جانە پوليتسيا قىزمەتكەرلەرىنىڭ جاۋىنگەرلىك رۋحىن كوتەرۋ ماقساتىندا ارنايى كەلگەنىن ايتتى. بۇلىك كەزىندە بارلىق سالماق كۇشتىك قۇرىلىمداردىڭ يىعىنا تۇسكەنىن، ولاردىڭ تەررورلىق شابۋىلدارعا قارسى وق پەن وتتىڭ ورتاسىندا ءجۇرىپ ەل تىنىشتىعىن قورعاعاندارىن ريزاشىلىقپەن اتاپ ءوتتى. سول سياقتى قازا بولعان قىزمەتكەرلەردىڭ وتباسىنا بارلىق قاجەتتى كومەك كورسەتىلەتىنىن جەتكىزدى.
«ەرەن ەرلىكتەرىڭىز ءۇشىن جەتىسۋ جۇرتشىلىعىنىڭ اتىنان سىزدەرگە زور العىس ايتامىن. لاڭكەستەرمەن كۇرەس كەزىندە بىرنەشە پوليتسيا قىزمەتكەرى قازا تاپتى. زارداپ شەككەندەر دە كوپ. بۇل تەك ولاردىڭ وتباسىلارىنىڭ عانا ەمەس، بارشامىزدىڭ ورتاق قايعىمىز. مەملەكەت ولاردىڭ جانۇيالارىن قيىندىقتا جالعىز قالدىرمايدى. ءبىز ولاردى ءوز نازارىمىزعا الىپ، قامقورلىق جاسايمىز. ءاربىر قازا بولعان ازاماتتاردىڭ وتباسىنا 5 ميلليون تەڭگەدەن ءبىرجولعى ماتەريالدىق كومەك كورسەتىلەتىن بولادى. بالالارىنىڭ وقۋ اقىسىنا كومەكتەسىپ، باسقا دا قولداۋ شارالارى قاراستىرىلادى»، - دەدى قانات بوزىمبايەۆ.
الداعى ۋاقىتتا پوليتسيا مەن ارنايى ورگاندار قىزمەتكەرلەرىنە جان- جاقتى قولداۋ كورسەتۋدىڭ كەشەندى شارالارى قاراستىرىلاتىن بولادى. سونىڭ ىشىندە ولاردىڭ ستاتۋسىن كوتەرۋ، شتات سانىن كوبەيتۋ، تۇرعىن ۇيمەن قامتۋ، كولىك جانە باسقا دا ماتەريالدىق تەحنيكالىق قامتاماسىز ەتۋ قولعا الىنادى.
«بۇرىنعىداي ەمەس، قازىر حالىقتىڭ سىزدەرگە دەگەن كوزقاراسى وزگەردى. اسىرەسە، سوڭعى ەكى- ءۇش كۇن ىشىندە كوپشىلىكتىڭ پوليتسياعا دەگەن قۇرمەتى ارتىپ، ولاردىڭ قادىرىن ءتۇسىندى. بۇگىنگى كۇنى دە ءوز مىندەتتەرىڭىزدى لايىقتى اتقارىپ، حالىق كۇزەتىندە تۇرسىزدار. قيىن كەزەڭدە ەرەن ەرلىك كورسەتكەن سىزدەردىڭ ءارقايسىلارىڭىزدى ءبىز باتىر دەپ بىلەمىز!»- دەدى وبلىس باسشىسى.
ەستەرىڭىزگە سالا كەتەيىك، 9-جانە 10-قاڭتار كۇنى الماتى وبلىسىنىڭ ەكى تۇرعىنى جەر قوينىنا تاپسىرىلدى. ولار تالدىقورعاندا قارۋلانعان تەرروريستەرمەن اتىس كەزىندە قازا تاپقان لا-155/16 مەكەمەسىنىڭ اعا باقىلاۋشىسى ەربول ەرجانوۆ پەن الماتى وبلىسى پوليتسيا دەپارتامەنتىنىڭ جەدەل قيمىلداۋ ارنايى جاساعىنىڭ ينسپەكتورى دارحان بارعانايەۆ.
ولار پرەزيدەنت جارلىعىمەن «ايبىن» وردەنىمەن ماراپاتتالدى.
