تەرىگە زيانىن كەلتىرەتىن 5 ادەت

نۇر-سۇلتان. قازاقپارات - ءاربىر ايەل ادام تەرىسىنىڭ ءمىنسىز بولعانىن قالايدى. ۋاقىتىلى تەرى كۇتىمىن جاساساڭىز دا، تەرىڭىز كۇڭگىرت تۇسكە ەنىپ، ءتىپتى، بەزەۋ دە پايدا بولا ما؟

ءسىز ويلاماعان كەي ادەتتەر تەرىگە زيانىن كەلتىرۋى ابدەن مۇمكىن. ەندەشە، تەرىگە زيانىن كەلتىرەتىن قانداي قاتەلىكتەر جىبەرۋىڭىز مۇمكىن؟

1-قاتەلىك: ۇيىقتار الدىندا ماكياجدى كەتىرمەۋ.

تەرى ۇيقى كەزىندە بەلسەندى «جۇمىس ىستەيدى»: ۋىتسىزداندىرۋ، جازىلۋ جانە جاڭارۋ پروتسەستەرى جىلدامدايدى. سوندىقتان تاڭەرتەڭگى سىرتقى كەلبەتىڭىز دۇرىس تۇنگى كۇتىمگە تىكەلەي بايلانىستى. ءبىرىنشى كەزەكتە، بەتىڭىز بەن موينىڭىزدى لاستىق پەن ماكياجدان مۇقيات تازارتىڭىز. تەرى جاعدايىنا ءمان بەرىڭىز: ەگەر ول مايلانۋعا بەيىم بولسا، جۋىنۋعا ارنالعان گەل نەمەسە كوبىك تاڭداڭىز. ال ەگەر تەرى قۇرعاق ءارى سەزىمتال بولسا، ءسۇت نەمەسە ميتسەلليارلى سۋ نەگىزىندەگى بەت جۋاتىن قۇرال الىڭىز.

2-قاتەلىك: SPF اسەرى بار قۇرالدى كۇنىنە تەك ءبىر رەت قولدانۋ.

مۇنداي قۇرالدىڭ قورعانىش اسەرى تەك ەكى ساعاتقا جەتەدى. ەگەر تۇسكى ۇزىلىستە دالاعا شىقساڭىز، تاڭەرتەڭ جاققان SPF نەگىزىندەگى تونالدى كرەمىڭىز تەرىڭىزدى ۋلتراكۇلگىننەن قورعامايدى. ءبىراق بۇل بارلىق ماكياجىڭىزدى كەتىرىپ، قايتا تونالدى كرەم جاعۋ كەرەك دەگەن ءسوز ەمەس. كۇنى بويى SPF اسەرى بار سپرەي، وپا نەمەسە كۋشون قولدانۋ ارقىلى قورعانىش قاباتتى جاڭارتا الاسىز.

3-قاتەلىك: ۇيقى رەجيمىن بۇزۋ.

كۇنى بويى تەرى كوپتەگەن نەگاتيۆ فاكتورلارعا قارسى تۇرۋعا ءماجبۇر. ولاردىڭ ىشىندە ۋلتراكۇلگىن ساۋلە مەن قالانىڭ لاس اۋاسى بار. سوندىقتان ونىڭ قالپىنا كەلۋىنە مۇمكىندىك بەرۋ كەرەك. ەگەر ۇيقى ساپسىنا ءمان بەرمەسەڭىز، تەرى تونۋسى مەن ونىڭ جارقىراۋىن جوعالتاسىز.

4-قاتەلىك: ماكياجعا ارنالعان جاققىشتاردى جۋماۋ.

كوپشىلىك ماكياجعا ارنالعان جاققىشتاردى تازارتۋعا اسا ءمان بەرمەيدى. الايدا جاققىش بەت تەرىسىمەن جاناسقان كەزدە وعان باكتەريالار تۇسەدى جانە ۋاقىت وتە ولار تۇكتەردىڭ اراسىنا جينالادى. سايكەسىنشە، جاققىشتى ءار كەيىنگى قولدانۋ كەزىندە باكتەريالار قايتادان بەتكە ورالادى. سوندىقتان ولاردى ۋاقىتىلى سابىنمەن جۋىپ تۇرۋ ماڭىزدى.

5-قاتەلىك. كوپ ءتاتتى تاعامدار جەۋ.

كوپتەگەن زەرتتەۋلەر گليكەميالىق يندەكسى جوعارى ونىمدەر (اق نان مەن تاتتىلەر) بەزەۋدىڭ پايدا بولۋىن شاقىراتىنىن دالەلدەدى. ال گليكەميالىق يندەكسى تومەن ونىمدەر (جەمىستەر مەن بۇرشاقتىلار) بورتپەلەر شىعارتپايدى. ارينە، بىردەن بارلىق شوكولاد پەن تورت تىلىمدەرىنەن باس تارتۋعا شاقىرمايمىز. الايدا، تەرىڭىزدىڭ ءمىنسىز بولعانىن قالاساڭىز، تاتتىلەردى اپتاسىنا 1-2 رەتتەن ارتىق جەمەۋگە كەڭەس بەرەمىز.

massaget.kz