مەملەكەتكە 5 ميلليارد تەڭگە زالال كەلتىرگەندەر ۇستالدى

نۇر-سۇلتان. قازاقپارات - قىزىلوردا وبلىسىندا ۇ ق ك وڭىرلىك دەپارتامەنتى قىزمەتكەرلەرى پروكۋراتۋرا قىزمەتكەرلەرىمەن بىرلەسىپ، كيىك مۇيىزدەرىن زاڭسىز يەمدەنۋ جانە وتكىزۋ دەرەگىنە قاتىسى بار قىلمىستىق توپتىڭ زاڭسىز ارەكەتىن انىقتاۋعا ارنالعان ارنايى وپەراتسيا جۇرگىزدى، - دەپ حابارلايدى ق ر ۇ ق ك باسپا ءسوز قىزمەتى.

«8-جەلتوقساندا دەريۆاتتاردىڭ ءىرى پارتياسىنا قاتىستى ارەكەت كەزىندە قىلمىستىق سحەما ۇيىمداستىرعان جەرگىلىكتى ەكى تۇرعىن ۇستالدى. جالپى سالماعى 500 كەلى 2347 كيىك ءمۇيىزى تاركىلەندى. براكونەرلەر 1174 كيىك ولتىرگەن. ناتيجەسىندە، مەملەكەتكە 5 ميلليارد تەڭگە زالال كەلتىرگەن. وسى قىلمىس سالدارىنان قازاقستانداعى كيىك تۇقىمىنا ايتارلىقتاي زيان كەلدى. ۇستالعان ادامدارعا قاتىستى كۇزەتپەن ۇستاۋ تۇرىندەگى بۇلتارتپاۋ شاراسى تاڭدالدى»، - دەپ حابارلادى ۆەدومستۆو وكىلدەرى.

سوتقا دەيىنگى تەرگەپ- تەكسەرۋ بارىسىندا ق ر ق ك 339-بابى 3-بولىگىنىڭ 2-تارماعى (جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق، پايدالانۋعا تىيىم سالىنعان تۇرلەرىمەن، بولىكتەرىمەن نەمەسە دەريۆاتتارىمەن زاڭسىز اينالىسۋ) بويىنشا زاڭسىز ارەكەتكە وزگە دە قاتىسۋشىلاردى انىقتاۋ، ايىپتالۋشىلاردا كيىك مۇيىزدەرىنىڭ قوسىمشا پارتيالارى بار ما دەگەن سۇراق بويىنشا تەرگەۋ جانە جەدەل ءىس- شارالار كەشەنى جۇرگىزىلىپ جاتىر.