الەكسەي سوي: بالالاردى 5 جاستان باستاپ ۆاكسينالاۋ ماسەلەسى تالقىلانۋدا

نۇر- سۇلتان. قازاقپارات - ق ر دەنساۋلىق ساقتاۋ ءمينيسترى الەكسەي سوي Azattyq Rýhy پورتالىنا بەرگەن سۇحباتىندا قازاقستاندىق بالالاردى ۆاكسينالاۋعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بالالاردى ۆاكسينالاۋ قازىر بىزدە جوبادا بار. ءبىراق ول تەك ەرىكتى تۇردە، اتا- انالاردىڭ كەلىسىمى بويىنشا عانا بولادى. بىزگە بالالارىن ۆيرۋستان قورعاعىسى كەلەتىن اتا- انالاردان وتە كوپ وتىنىمدەر ءتۇسىپ جاتىر. قازىر ءبىز ماسەلەنى پىسىقتاپ جاتىرمىز. ءتورتىنشى توقساندا Pfizer ۆاكسيناسىن جەتكىزۋ جوسپارلانعان. ول ۆاكسينا 12 جاستان اسقان بالالاردى ۆاكسينالاۋ بويىنشا ءبىرقاتار جەتەكشى ەلدەردىڭ ماقۇلداۋىن العان. قازىردىڭ وزىندە مامانداردىڭ جاعىمدى قورىتىندىسى بار. كەلەشەكتە بالالاردى 5 جاستان باستاپ ۆاكسينالاۋ ماسەلەسى تالقىلانىپ جاتىر. قولدانۋ تاجىريبەسى بولدى. رەسمي رەتتەۋشىلەر قاۋىپسىز ەكەنىن راستاعان جاعدايدا بىزدە دە وسنىنداي مۇمكىندىك پايدا بولادى. ءدال قازىرگى ساتتە 12 جاستان باستاپ ۆاكسينالاۋدى جوسپارلاپ وتىرمىز. ارينە، ءبىز كەڭەس بەرەمىز. ازاماتتار قالاسا، بالالارىن قولداعىسى كەلسە، بۇل ەلەۋلى قولداۋ بولادى»، - دەگەن مينيستر ەكپە الىپ جاتقان قازاقستاندىقتار اراسىندا ۆاكسينانىڭ قاي تۇرىنە سۇرانىس كوبىرەك ەكەنىن ايتتى.

«وسىدان جارتى ساعات بۇرىن مەن نۇر- سۇلتانداعى №5 قالالىق ەمحانادا بولىپ قايتتىم. سول كەزدە ارىپتەستەرىمىزدەن سۇرادىق. قازىر ۆاكسينانىڭ بىرنەشە ءتۇرى بار. ازاماتتاردىڭ بۇل تۇرعىدا تاڭداۋى ءار ءتۇرلى بولىپ شىقتى. QazVac تا، سپۋتنيك V - دە، Sinofarm دا سۇرانىستا. ياعني، ازاماتتار ءوز قالاۋى بويىنشا تاڭداۋ جاساپ جاتىر. جوسپار بويىنشا كەلىپ جاتقان ۆاكسينالاردىڭ ءبارى سۇرانىسقا يە. ارتىلىپ قالىپ جاتقانى جوق. كەلەسى پارتيالارىن كۇتىپ وتىرمىز. ۆاكسينانىڭ ءتۇرى بويىنشا تەڭدەي قولدانىس بار ەكەنىن كورىپ وتىرمىز. ياعني، ۆاكسينالاردىڭ ەشبىرى تۇرىپ قالىپ جاتقان جوق. جوسپار بويىنشا جەتكىزىلىپ جاتقان ۆاكسينانىڭ ءبارى قولدانىلىپ جاتىر»، - دەدى الەكسەي سوي.

اۆتور: ەسىمجان ناقتىباي