قازاقستان اسكەريلەرى 5 عىلىمي پاتەنتكە يەلىك ەتىپ وتىر
ونىڭ ىشىندە «شاعالا» پيلوتسىز ۇشۋ اپپاراتى دا بار، دەپ حابارلايدى قازاقپارات.
«2017 -جىلى وزىمىزدەگى وقۋ ورىندارىن ماقساتتىق قارجىلاندىرۋ باعدارلاماسى بويىنشا گرانت كونكۋرسىنا قاتىستىرۋ ءۇشىن عىلىمي جۇمىس نىساندارى رەتىندە اككرەديتتەۋدەن وتكىزدىك. وسىنداي كونكۋرستار شەڭبەرىندە 2018-2020 -جىلدارى تۇڭعىش پرەزيدەنت- ەلباسى اتىنداعى ۇلتتىق قورعانىس ۋنيۆەرسيتەتى 13 جوبا مەن 3 عىلىمي باعدارلامانى ۇتىپ الدى. قازىر ول جوبالاردىڭ ءبارى ىسكە اسىرىلعان. عىلىمي زەرتتەۋلەردىڭ جارقىن مىسالى رەتىندە «شاعالا» پيلوتسىز ۇشۋ اپپاراتىن ايتۋعا بولادى. ءوزىنىڭ تەحنيكالىق سيپاتتارى بويىنشا ول پيلوتسىز اۆياتسيا سالاسىنداعى وزگە جەتەكشى وندىرۋشىلەردىڭ ونىمىنەن كەم تۇسپەيدى»، - دەدى مينيسترلىك وكىلى.
دەپارتامەنت باستىعىنى دەرەگى بويىنشا، ۇلتتىق قورعانىس ۋنيۆەرسيتەتىنىڭ بازاسىنداعى اسكەري- عىلىمي ۆزۆودتىڭ قۇرامىنداعى 12 ادام دا ءتۇرلى عىلىمي زەرتتەۋلەرگە قاتىسىپ ءجۇر.
«13 عىلىمي جوبا مەن 3 عىلىمي باعدارلاما اياسىندا پايدالى مودەلدەردى شىعارۋ بويىنشا 5 پاتەنت، 22 زياتكەرلىك مەنشىك جانە اۆتورلىق قۇقىق كۋالىگى الىندى. شەتەلدىك جانە وتاندىق باسىلىمداردا 240-تان استام عىلىمي ماقالا جاريالاندى»، - دەدى تالعات قاليشيەۆ.
سونداي- اق، ول اسكەري ءبىلىم بەرۋدى سيفرلاندىرۋ ءۇشىن e-intellect پورتالى جاسالعانىن ەسكە سالدى.
«قازىر بۇل باعدارلاما بارلىق وقۋ ورىندارىندا پيلوتتىق رەجيمدە قولدانىلىپ ءجۇر. بۇكىل وقىتۋشىلار قۇرامى، كۋرسانتتار مەن ماگيسترانتتار وسى پورتالدى جۇكتەپ العان. قازىر ول بەلسەندى قولدانىلادى. الداعى ۋاقىتتا ءتيىستى سەرتيفيكاتىن الامىز»، - دەدى اسكەري ءبىلىم جانە عىلىم دەپارتامەنتىنىڭ باستىعى.
اسكەري ءبىلىم جانە عىلىم دەپارتامەنتىنىڭ باستىعى تالعات قاليشيەۆتىڭ ايتۋىنشا، اتالعان ماماندىقتى مەڭگەرۋشىلەر كوبىنە ىرگەلەس مەملەكەتتەردە ءبىلىم الىپ ءجۇر.
«قازىرگى ۋاقىتتا رەسەي فەدەراتسياسىندا، بەلارۋس، ارمەنيا، قىتاي، تۇركيا، ا ق ش، ءۇندىستان، پاكىستان جانە باسقا دا ەلدەردە قازاقستاننىڭ ازاماتتارى اسكەري ءبىلىم الىپ جاتىر. ول وقۋ ورىندارىنا ءتۇسۋ ءۇشىن قورعانىس ءمينيسترىنىڭ №371 بۇيرىعى بار. بيىلعى قابىلداۋ مەرزىمى تامىز ايىندا بولاتىنىن ايتقىم كەلەدى»، - دەدى تالعات قاليشيەۆ.
اۆتور: ەسىمجان ناقتىباي
