الماز شارمان: بالالار «دەلتا» شتامىن 5 ەسە ءجيى جۇقتىرا باستادى

نۇر-سۇلتان. قازاقپارات - بەلگىلى يممۋنولوگ الماز شارمان قازاقستانداعى ەپيدەميولوگيالىق جاعدايدى ايسبەرگكە قارسى جۇزگەن كەمەگە تەڭەدى، دەپ حابارلايدى قازاقپارات.

ورتالىق كوممۋنيكاتسيالار قىزمەتىندەگى باسپا ءسوز ءماسليحاتىنا تىكەلەي بايلانىس ارقىلى قوسىلعان پروفيلاكتيكالىق مەديتسينا اكادەمياسىنىڭ پرەزيدەنتى، امەريكا دەنساۋلىق ساقتاۋ قاۋىمداستىعىنىڭ مۇشەسى، پروفەسسور، يممۋنولوگ الماز شارمان COVID-19 ىندەتىنىڭ «جاسارىپ» كەلە جاتقانىن ايتىپ، دابىل قاقتى.

«بالالار كوروناۆيرۋستىڭ «دەلتا» نۇسقاسىمەن 5 ەسە ءجيى اۋىراتىن بولدى. ياعني، COVID-19 «جاسارىپ» كەتكەن. ءبىراق ينفەكسيانىڭ بالا اعزاسىندا قانشالىقتى اگرەسسيۆتى داميتىنى ازىرگە بەلگىسىز. ەرەسەك ادامدارعا كەلسەك، ەكپە الماعانداردىڭ شالدىعۋى جوعارى بولىپ تۇر. سوندىقتان ۆاكسينا كوروناۆيرۋس ينفەكسياسىنىڭ «دەلتا» جانە وزگە دە نۇسقالارىنا قارسى قولداناتىن جالعىز قارۋ بولىپ وتىر»، - دەدى پروفەسسور.

مامان دەلتا- شتامدى ۆيرۋستان تولىقتاي قورعانۋ ءۇشىن ۆاكسينانىڭ ەكى كومپونەنتىن دە تولىق الۋ كەرەكتىگىن ەسكەرتتى.

«ۆاكسينانىڭ ءبىرىنشى كومپونەنتى «دەلتا» نۇسقادان 17 پايىز ناشار قورعايدى. ەكىنشى كومپونەنت العاننان كەيىن قورعانىش قابىلەتى قالىپقا تۇسەدى. ەپيدەميانىڭ «دەلتا» نۇسقاسى ەكپە العاندار مەن الماعانداردىڭ اراسىنداعى كەڭىستىكتى ودان ءارى كەڭەيتىپ جىبەردى. جۇقتىرۋ جانە ءولىم-ءجىتىم تاۋەكەلى بويىنشا ەكى ساناتتاعى ادامدار ەكى ءتۇرلى الەمدە ءومىر ءسۇرىپ جاتىر دەۋگە بولادى. ەكپە العاندار ءوزىنىڭ يممۋندىق جۇيەسى دەلتا- شتامنان قورعايتىنىنا سەنە الادى. ال ۆاكسينا الماعاندار پاندەميانىڭ ەڭ قاۋىپتى فازاسىنا وتكەنىن تۇسىنۋلەرى كەرەك. كوروناۆيرۋستان ەمدەيتىن ءدارىنىڭ جوق ەكەنىن ۇمىتپاۋ قاجەت. قازىر ءبىز ونىڭ سالدارىن عانا ەمدەپ جاتىرمىز. قان سۇيىلتاتىن جانە قابىنۋعا قارسى دارىلەر، وكپەنى جاساندى جولمەن جەلدەتۋ تاسىلدەرىنىڭ ءبارى - سالدارىمەن كۇرەسۋ عانا»، - دەدى ساراپشى.

امەريكا دەنساۋلىق ساقتاۋ قاۋىمداستىعىنىڭ مۇشەسى الماز شارماننىڭ ايتۋىنشا، بۇگىندە الەم بويىنشا 3 ميللياردتان استام ۆاكسينا سالىنعان.

«الەمدەگى ءار 100 ادامنىڭ 39 ى ۆاكسينا العان. ءبىراق ا ق ش، يزاريل جانە ەۋروپا ەلدەرىندە ۆاكسينالاۋ كورسەتكىشى جاقسى بولعانىمەن، الەمنىڭ باسقا وڭىرلەرىندە ەكپە قارقىنى باسەڭ. قازاقستاندا حالىقتىڭ تەك 17 پايىزى عانا ۆاكينانىڭ ءبىرىنشى دوزاسىن، 10 پايىزى ەكى دوزاسىن بىردەي العان. مەن ەلدىڭ 80 پايىزدان استامى ەكپە الماعان قازاقستاننىڭ جاعدايىن ايسبەرگكە قارسى جۇزگەن كەمەگە تەڭەر ەدىم. ۆاكسينا ايسبەرگتىڭ ەرۋىن جىلدامداتاتىن قۇرال بولىپ وتىر. ەپيدەميولوگياعا قارسى شارالاردىڭ كەز كەلگەن ءتۇرى السىرەسە، ايسبەرگكە سوعىلۋ قاۋپى جوعارىلايدى. قازىرگى 80 پايىز حالىقتىڭ ەكپە الماۋى بىزگە جەتكىلىكسىز. بۇلاي كەتە بەرسە، ايسبەرگكە سوعىلاتىنىمىز ايقىن»، - دەدى يممۋنولوگ.