ازيا چەمپيوناتى: قازاقستاندىق 5 بوكسشى فينالعا شىقتى

نۇر-سۇلتان. قازاقپارات - بوكستان بىرىككەن اراب امىرلىگىنىڭ دۋباي قالاسىندا ءوتىپ جاتقان ازيا چەمپيوناتىندا ەرلەر اراسىندا جارتىلاي فينال ويىندارى ءوتتى، دەپ حابارلايدى قازاقپارات ءتىلشىسى.

جارىستىڭ اتالعان ساتىسىندا ەلىمىز اتىنان 6 بىلعارى قولعاپ شەبەرى سىنعا تۇسەتىنىن جازعان ەدىك. جارتىلاي فينالدا رينگكە العاشقى بولىپ شىققان دانيال ءسابيت (49 كەلى) فيليپپيندىك مارك لەستەر ديۋرەنستىڭ وسال تۇسىن تابا الدى.

ال ابىلايحان ءجۇسىپوۆ (69 كەلى) موڭعوليالىق باتتومور ميشەەلتتەن مىقتى ەكەنىن كورسەتتى. تاعى ءبىر قازاقستاندىق بوكسشى ءابىلحان امانقۇل 75 كەلىدە يراندىق سەيەدشاحين مۋساۆيدى تىزە بۇكتىردى. 91 كەلىدە ۆاسيلي لەۆيت قىرعىزستاندىق رۋستام ىرىسبەك ۋۋلمەن شارشى الاڭدا باسەكە كورىگىن قىزدىرىپ، جەڭىستى جولىن جالعاستىردى.

ۇلتتىق قۇراما كاپيتانى قامشىبەك قوڭقابايەۆ (91 كەلى) يراندىق پۋريا اميريدەن باسىم ءتۇستى. ال 52 كەلىدە ساكەن بيبوسىنوۆ اميت پانگالدان جەڭىلىپ قالدى. وسىلايشا قازاقستاندىق 5 بوكسشى فينالعا جولداما الدى.

ەسكە سالساق، كەشە قىزدار اراسىندا جارتىلاي فينال جەكپە- جەكتەرى ءوتتى. 5 بوكسشى - فينالدا. ازيا چەمپيوناتى 24-مامىردا باستالدى. اقتىق كەزدەسۋلەر 31-مامىردا بولادى.

اۆتور: ءادىلجان ۇمبەت