16:39, 23 - مامىر 2021 | GMT +5
كونگودا جانارتاۋ اتقىلاپ، 5 مىڭنان استام ادام رۋانداعا قاشتى
پرەتوريا. قازاقپارات - كونگو دەمكراتيالىق رەسپۋبليكاسىنىڭ (ك د ر) شىعىسىنداعى گوما قالاسىنىڭ 5 مىڭنان استام تۇرعىنى نيراگونگو جانارتاۋىنىڭ قاتتى اتقىلاۋىنا بايلانىستى ۇيلەرىن تاستاپ، كورشىلەس رۋانداعا قاشتى.
بۇل تۋرالى جەكسەنبىدە ەلدىڭ Actualite جاڭالىقتار پورتالى حابارلادى.
ادامدار جانارتاۋ لاقتىرعان لاۆا اعىنىنان قاشىپ قۇتىلدى، دەپ جازدى باسىلىم. قۇربان بولعاندار تۋرالى رەسمي مالىمەتتەر ءالى كەلگەن جوق. بيلىك لاۆا اعىنى قاۋىپ توندىرەتىن قالا اۋداندارىنىڭ تۇرعىندارىن ەۆاكۋاتسيالاۋ جوسپارىن ىسكە قوستى.
پورتال جانارتاۋدىڭ جانىندا ورنالاسقان گوما قالاسىنىڭ ماڭىنا كەلتىرىلگەن ءىرى ماتەريالدىق زالال تۋرالى حابارلادى. Actualite مالىمەتتەرى بويىنشا، لاۆانىڭ نەگىزگى اعىنى گومانىڭ سولتۇستىك - شىعىس شەتىندەگى اۋەجايعا قاراي جىلجۋدا. گومادا 1,5 ميلليون ادام تىرشىلىك كەشىپ جاتىر. افريكانىڭ ەڭ بەلسەندى جانارتاۋلارىنىڭ ءبىرى نيراگونگونىڭ اتقىلاۋى سەنبى كۇنى كەشكە بولدى. جانارتاۋدىڭ بيىكتىگى 3470 مەترگە جەتتى.
