اقسۋدا جىلىنا 5 ميلليون توننا التىن رۋداسىن وڭدەيتىن زاۋىت ىسكە قوسىلادى

ءىرى جوبانىنىڭ ارقاسىندا 600 جاڭا جۇمىس ورنىن اشۋ جوسپارلانۋدا. بۇل تۋرالى بريفينگىدە قالا اكىمى ەركەبۇلان باياحمەتوۆ ءمالىم ەتتى، دەپ حابارلايدى قازاقپارات ءتىلشىسى.

قالا اكىمىنىڭ ايتۋىنشا، جوبانى «اقسۋ Teсhnology» جاۋاپكەرشىلىگى شەكتەۋلى سەرىكتەستىگى قولعا الىپ وتىر.

«اقسۋ كەنتىندە رۋدا وڭدەپ، التىن وندىرەتىن زاۋىت قۇرىلىسى بويىنشا ءىرى اۋقىمدى جوبانى ىسكە اسىرۋ اياقتالۋعا جاقىن. وسى جوبانىڭ ارقاسىندا 600 جاڭا جۇمىس ورنى اشىلاتىن بولادى. سونىمەن قاتار، «نەفتيانوي دوم استانا ويل» سەرىكتەستىگىنىڭ قاتىسۋىمەن «قازىنا كاپيتال مەنەدجمەنت» اكسيونەرلىك قوعامى شاعىن مۇناي وڭدەۋ زاۋىتىن جاڭعىرتۋ بويىنشا جوبانى جۇزەگە اسىرۋدا. بۇل ديزەل وتىنىن وندىرۋگە جانە ساپاسىن جاقسارۋتعا مۇمكىندىك بەرەدى»، - دەدى ەركەبۇلان باياحمەتوۆ.

قالا اكىمى اتاپ وتكەندەي، رەسپۋبليكالىق يندۋستريالاندىرۋ كارتاسى جانە اقمولا وبلىسىنىڭ كاسىپكەرلىكتى دامىتۋ كارتاسىنىڭ جوبالارى بويىنشا ستەپنوگوردە 19 ميلليارد تەڭگەنىڭ تاۋار ءونىمى ءوندىرىلدى.