پوليسەيلەر ءىز- ءتۇزسىز جوعالعان 5 قاراعاندىلىقتى تاپتى
وبلىستىق پ د- نىڭ اۋماقتىق بولىمشەلەرىنە ءبىر كۇندە ءوڭىردىڭ بەس تۇرعىنى جۇگىنىپ، تۋىستارىنىڭ جوعالعانى تۋرالى حابارلاعان. بۇل جاعدايلار ءبىر- بىرىمەن بايلانىستى ەمەس. ماسەلەن، شاحتينسك قالاسىنىڭ پوليتسيا بولىمىنە 27 جاستاعى قالا تۇرعىنىنان ارىز تۇسكەن. ول 24 جاستاعى جۇبايىنىڭ جوعالىپ كەتكەنىن ايتتى. 15-مامىردا ول ۇيىنەن كەتىپ، ورالماعان. ايەلىندە ەكى ۇيالى تەلەفون بولعان، ءبىراق بارلىق قۇرىلعىلار قانداي دا ءبىر سەبەپتەرمەن بالانىستان تىس بولعان. كۇيەۋى دابىل قاعىپ، الدىمەن ونى ءوز بەتىنشە تابۋعا تىرىسقان. ءتىپتى الەۋمەتتىك جەلىلەردە كومەك سۇراعان. ءبىراق ءوز بەتىنشە ىزدەۋ جۇمىستارى ءساتسىز بولعاندىقتان، ەر ادام پوليسياعا جۇگىنگەن.
«جوعالعان ايەلدى بىرنەشە توپ ىزدەۋگە كىرىستى. ءبىراز ۋاقىتتان كەيىن ول قاراعاندىدان تابىلدى. ءوتىنىش بەرۋشىنىڭ ايەلىنىڭ ايتۋىنشا، ونىڭ ۋاقىتشا كەتىپ قالۋىنا وتباسىنداعى قارىم- قاتىناس سەبەپ بولعان»، - دەپ حابارلادى قاراعاندى وبلىسى پ د باسپا ءسوز قىزمەتىنەن.
ءدال وسىنداي سەبەپپەن اباي قالاسىنىڭ 31 جاستاعى تۇرعىنى 15-مامىر كۇنى كەشكە ۇيىنەن كەتىپ قالعان. ايەل دوستارىنا قوناققا كىرىپ، سول جەردە قالىپ قويعان. ونىڭ جوعالىپ كەتكەنى تۋرالى پوليسياعا 61 جاستاعى اناسى حابارلادى. پوليسيا جوعالعان ادامنىڭ ورنالاسقان جەرىن بىرنەشە ساعاتتان سوڭ انىقتاعان.
ءبىر تاۋلىكتەن استام ۋاقىت بويى قاراعاندىنىڭ 16 جاستاعى تۇرعىنى دا ىزدەستىرىلدى. ول دوسىنىڭ ۇيىنە بارىپ، سول جەردە قالىپ قويعان. الايدا 56 جاستاعى اناسىنا ول جايلى ەسكەرتپەگەن. قىزدى تۋىستارى مەن پوليسەيلەر ىزدەپ، تاۋىپ الدى. 16- مامىر كۇنى كەشكە 46 جاستاعى قاراعاندىلىق سەرۋەندەۋگە شىعىپ، ۇيىنە ورالماعان. بۇل تۋرالى ونىڭ 33 جاستاعى ايەلى حابارلادى. ايەل ءتۇنى بويى جۇبايىن كۇتىپ، ۇيىنە كەلمەگەن سوڭ وعان ىزدەۋ جاريالاپ، پوليتسياعا جۇگىنگەن. حابار- وشارسىز كەتكەن ەر ادامدى ىزدەستىرۋمەن قاراعاندى قالاسى پ ب ورتالىق پوليسيا ءبولىمىنىڭ قىزمەتكەرلەرى اينالىستى. ەر ادام تابىلدى، ول دوستارىندا بولعانى انىقتالدى.
ال 17-مامىر كۇنى ساعات 18.14-تە قاراعاندى قالاسى پب وكتيابر پوليسيا بولىمىنە 58 جاستاعى قالا تۇرعىنى 12 جاستاعى نەمەرەسىنىڭ ساعات 12.30 شاماسىندا ۇيدەن كەتىپ، قايتىپ كەلمەگەنى تۋرالى حابارلاعان. حابار- وشارسىز جوعالعان كامەلەتكە تولماعان بالانىڭ تۇرعان جەرىن انىقتاۋ ماقساتىندا پوليتسيا ءبولىمىنىڭ جەكە قۇرامى مەن قۇزىرداعى بارلىق قىزمەتتەرى باعدارلاندى. جەتى ىزدەۋ توبى قۇرىلدى. ولار دەرەۋ قالانىڭ بارلىق اۋداندارىندا ىزدەۋ جۇمىستارىن جۇرگىزە باستادى. سونداي- اق، وكتيابر اۋدانىنىڭ پروكۋراتۋراسىنىڭ ەرىكتىلەرى مەن قىزمەتكەرلەرى قۇقىققورعاۋ ورگاندارىنا كومەك كورسەتە باستادى.
«ىزدەۋ شارالارى بارىسىندا ءتورت ساعاتتان كەيىن پوليتسيا ءبولىمىنىڭ قىزمەتكەرلەرى اۋداندىق پروكۋراتۋرا ءبولىمىنىڭ پروكۋرورىمەن بىرگە قاراعاندى قالاسى ەرمەكوۆ كوشەسىندە كامەلەتكە تولماعان بالانى تاپتى. جۇرگىزىلگەن پروفيلاكتيكالىق اڭگىمەلەسۋدەن كەيىن قىز اتا-اناسىنا قايتارىلدى»، - دەپ حابارلادى قاراعاندى وبلىسى پ د باسپا ءسوز قىزمەتىنەن.
