تۇركىستاندا ۋلانىپ كوز جۇمعان 5 ادامنىڭ ءولىمى: كۇدىكتى ۇستالدى
بۇل تۋرالى قازاقپارات پوليتسيا دەپارتامەنتىنە سىلتەمە جاساپ حابارلايدى. پوليتسيا قىزمەتكەرلەرى بولعان وقيعانىڭ اۋىرلىعى مەن قوعامدىق رەزونانس تۋدىرۋىنا بايلانىستى جەدەل-تەرگەۋ شارالارىن اتقاردى.
ونىڭ ىشىندە ساراپتامالار تاعايىندالىپ، كۋاگەرلەردەن جاۋاپتار الىنىپ، قاجەتتى دەگەن بارلىق جۇمىستار جۇرگىزىلدى.
«ۋلى گازدان ءبىر وتباسىنىڭ بەس بىردەي مۇشەسى قازا بولىپ، ءبىزدىڭ وبلىستا ۇلكەن رەزونانس تۋدىردى. بۇگىنگى تاڭدا بۇل قىلمىستى جاسادى دەگەن كۇدىكتىلەردىڭ ءبىرى تۇركىستان قالاسىنىڭ تۇرعىنى ۇستالدى. ول گاز ورناتۋ فيرمالارىنىڭ بىرىندە ديرەكتور. تياناقتى جۇرگىزىلگەن تەرگەۋ جۇمىستارىنىڭ اياسىندا ونىڭ ىسكە قاتىسى بار ەكەنى دالەلدەندى. ءبىز كۇدىكتىلەر سانىنىڭ ارتۋىن جوققا شىعارمايمىز. سوندىقتان تەرگەۋ جالعاسادى»، - دەپ اتاپ ءوتتى ت و پوليتسيا دەپارتامەنتى تەرگەۋ باسقارماسىنىڭ باستىعى نۇرماحان جالعاسوۆ.
ەستەرىڭىزگە سالا كەتەيىك، اقپان ايىنىڭ سوڭىندا تۇركىستان قالاسىنداعى جەر ۇيلەردىڭ بىرىندە بەس ادام، ياعني ايەل مەن ونىڭ ءتورت بالاسى قازا تاپقان. وقيعا بايلانىستى ارنايى كوميسسيا قۇرىلدى. تەرگەۋ بارىسىن تۇركىستان وبلىسىنىڭ اكىمى ءومىرزاق شوكەيەۆ جەكە باقىلاۋىنا الدى. وقيعاعا قاتىستى قىلمىستىق ءىس قوزعالدى.