پاۆلوداردا تۇراتىن وقۋشى 5 تىلدە سويلەيدى
بۇل تۋرالى قازاقپارات Рavlodarnews.kz سايتىنا سىلتەمە جاساپ حابارلايدى.
قالاداعى دارىندى بالالارعا ارنالعان اباي اتىنداعى گيمنازيانىڭ 8-سىنىپ وقۋشىسى زادا ايالا قازاق، ورىس، اعىلشىن، نەمىس، قىتاي تىلدەرىندە سويلەي الادى.
سونىمەن قاتار ول فورتەپيانودا جاقسى ويناپ، لينگۆيستيكالىق ينتەرفەرەنتسيانىڭ ەكى شەت ءتىلىن ۇيرەنۋدەگى كونسترۋكتيۆتى جانە دەسترۋكتيۆتى جاقتارىنا ارنالعان عىلىمي جوبا جازىپ ءجۇر. دارىندى قىزدىڭ ءتىل ۇيرەنۋگە دەگەن قىزىعۋشىلىعى كىشكەنتاي كەزىنەن باستاپ ويانعان.
«قازىر جاستار كوپ ءتىلدى ءبىلۋى كەرەك. ءبىلىمدى بولساڭ عانا ماقساتىڭا جەتەسىڭ، تۋعان ەلىڭدى الەمگە تانىتا الاسىڭ. انام اعىلشىن ءتىلى پانىنەن ستۋدەنتتەرگە ساباق بەرەدى، اكەم سپورت سالاسىندا. كەيدە وتباسىمىزدا اناممەن اعىلشىن تىلىندە دە سويلەسەمىز. ءقازىر نەمىس تىلىنەن وليمپياداعا دايىندالىپ ءجۇرمىن. الەمدە اعىلشىن، قىتاي تىلدەرىندە سويلەۋشىلەردىڭ سانى ارتۋدا. سوندىقتان وسى تىلدەردى مەڭگەرىپ عانا قويماي ءارى زەرتتەۋ كەرەك»، - دەيدى زادا ايالا. تالانتتى شاكىرت كوپ ءتىلدى ۇيرەنۋ قيىن دەگەن پىكىرمەن كەلىسپەيدى.
«ەگەر الدىڭا ماقسات قويساڭ ول ماقساتىڭ جولىندا بارلىق كەدەرگىلەردى جەڭە ءبىلۋىڭ كەرەك. ەستە ساقتاۋ قابىلەتىڭ ارتتىرۋ ءۇشىن ارنايى جاتتىعۋلار جاساۋعا كەڭەس بەرەمىن. ءتىلدى ۇيرەنۋدىڭ جولى كوپ. ءوزىم وقۋ ورتالىقتارىنا بارىپ عانا قويماي، ءتۇرلى تىلدەردە فيلم كورىپ، ءان تىڭداعاندى ۇناتامىن. ينتەرنەتتە ءتىل ۇيرەنۋشىلەرگە ارنالعان ءتۇرلى ونلاين ساباقتار دا بار. قىتاي ءتىلى - قيىن تىلدەردىڭ ءبىرى. سوندىقتان قىتاي ءتىلىمدى قازىرگى تاڭدا تەرەڭىرەك ۇيرەنىپ ءجۇرمىن. وتباسىمىزدا اپكەم الۋا دا ءتورت ءتىلدى بىلەدى»، - دەيدى ول.
دارىندى شاكىرتتىڭ ۇستازى شامشىراق قىدىربايەۆانىڭ ايتۋىنشا، ايالا 7-سىنىپتا وقي ءجۇرىپ، 9-سىنىپتىڭ اتىنان وليمپياداعا قاتىسىپ جۇلدەلى 3-ورىنعا يە بولعان.
«وتىز جىلدان بەرى ءبىلىم سالاسىندا جۇمىس ىستەيمىن. وسى ۋاقىت ارالىعىندا قانشاما مىقتى شاكىرتتەردى دايىنداپ شىعاردىق. ايالا سەكىلدى تالانتتى شاكىرتتەرمەن جۇمىس جاساۋ بالا تاربيەلەۋگە جىگەر بەرەدى. ونىڭ بويىنداعى ومىرگە دەگەن قۇشتارلىق، جاڭا نارسەنى ۇعىنۋعا تالپىنۋ ءار بالاعا ۇلگى بولۋى كەرەك»، - دەيدى شامشىراق بەكەنوۆنا.