ساپاربايەۆ جاڭاتاستاعى ورتتەن قازا بولعان 5 بالانىڭ اتا- اناسىنىڭ شاڭىراعىنا باردى

تاراز. قازاقپارات - كەشە جامبىل وبلىسىنىڭ اكىمى بەردىبەك ساپاربايەۆ جاڭاتاستاعى پاتەر ورتىنەن كوز جۇمعان بەس بالانىڭ اتا- اناسى مەن تۋىستارىنا بارىپ، مەملەكەت باسشىسىنىڭ اتىنان كوڭىل ايتتى، دەپ حابارلايدى قازاقپارات ءتىلشىسى.

وبلىس اكىمى مارقۇمداردىڭ اتا- اناسىنىڭ قارا شاڭىراعى ورنالاسقان تالاس اۋدانى، ءۇشارال اۋىلىنا ارنايى بارعان. ول تۋرالى ايماق باسشىسى ينستاگرام مەن Facebook-تەگى پاراقشاسىندا جازدى.

«بۇگىن تالاس اۋدانىنىڭ ءۇشارال اۋىلىندا بولدىم. جاڭاتاستاعى ءورت سالدارىنان كوز جۇمعان بالالاردىڭ اتا- اناسى ءقازىر وسىنداعى قارا شاڭىراعىندا. ابدىمالىكوۆتەر وتباسىنىڭ قايعىسىنا ورتاقتاسىپ، مەملەكەت باسشىسىنىڭ اتىنان كوڭىل ايتتىم. پرەزيدەنت تاپسىرماسىنا سايكەس، قارا جامىلعان جانۇياعا جان- جاقتى كومەك كورسەتىلۋدە»، - دەپ اتاپ وتكەن ءوز جازباسىندا بەردىبەك ساپاربايەۆ.

ەستەرىڭىزگە سالا كەتسەك، جامبىل وبلىسى سارىسۋ اۋدانى جاڭاتاس قالاسىنداعى 2 ىقشاماۋدانداعى 5 قاباتتى تۇرعىن ءۇيدىڭ 3- قاباتىندا ءورت بولىپ، 16 شارشى مەتر اۋماقتى شارپىدى. ءورت سالدارىنان پاتەردە ۇلكەندەردىڭ قاراۋىنسىز قالعان 2015, 2016, 2017, 2019 جانە 2020 -جىلى دۇنيەگە كەلگەن بەس ءسابي تۇتىنگە ۋلانىپ، جەدەل تۇردە اۋرۋحاناعا جەتكىزىلدى. الايدا اراعا ءبىراز ۋاقىت سالىپ، بارلىعى كوز جۇمدى.

الدىن الا مالىمەت بويىنشا، جاڭاتاستا پاتەردەگى ءورت تەز تۇتانعىش ماتەريالدىڭ بەتىنە اشىق وت كوزىنىڭ تۇسۋىنەن تۋىنداعان. پرەزيدەنت جاڭاتاس قالاسىندا قازا بولعان بالالاردىڭ اتا- انالارىنا كوڭىل ايتتى.

اۆتور: سايا سەمباي