مي جۇمىسىن جاقسارتۋدىڭ 5 ەرەجەسى
1. قيمىل- قوزعالىس
سپورتپەن شۇعىلدانۋ مي جۇمىسىنا وڭ اسەر ەتەدى. نەيروحيرۋرگ ءبىر عانا سپورت تۇرىمەن اينالىسپاي، جاتتىعۋلاردى الماستىرىپ تۇرۋ كەرەك دەگەن كەڭەس بەرەدى. مىسالى ىلعي جۇگىرەتىن بولساڭ، كەلەر جولى ۆەلوسيپەدپەن ءجۇرۋ نەمەسە سۋدا ءجۇزۋدى بايقاپ كورۋ كەرەك.
اەروبتى جانە كوپ كۇش جۇمسايتىن جاتتىعۋلار مي ءۇشىن وتە پايدالى. مي مەن فيزيكالىق جاتتىعۋ جاساۋ ءبىر- بىرىمەن تىكەلەي بايلانىستى، - دەيدى ساندجاي گۋپتا.
ەگەر كوپ كۇش جۇمسايتىن جاتتىعۋلار جاساعىڭ كەلسە، وندا باستاپقىدا قاراپايىم جاتتىعۋلاردان باستاۋ كەرەك. سپورتپەن شۇعىلدانۋعا، جاتتىعۋ جاساۋعا ۋاقىت تابىلماسا، نە قۇلقىڭ تارتپاسا، وندا كەي ءىستى ادەتكە اينالدىرۋدى ءجون سانايدى. مىسالى تەلەفونمەن سويلەسىپ ءجۇرىپ سەرۋەندەۋ، ليفت ورنىنا باسپالداقپەن شىعىپ ءتۇسۋ، كولىكتى جۇمىستان الىس تۇراققا قويۋ. مۇنىڭ ءبارى كوبىرەك قيمىل- قوزعالىس جاساۋعا سەپ بولادى.
2. وقۋ
وقۋ، جانا دۇنيەنى تانۋ - ميعا وتە پايدالى جاتتىعۋ. نەيروحيرۋرگ وقۋدا مىناداي كەڭەس بەرەدى:
• جۇمىسىڭ مەن قىزىعۋشىلىعىڭا قاتىسى جوق كىتاپ وقى؛
• سۋرەت سال نەمەسە تاماق پىسىرۋگە قاتىستى كۋرستارعا قاتىس؛
• جازۋشىلار ورتاسى نەمەسە وقىعان كىتابىن تالقىلايتىن كلۋب قۇرامىنا قوسىل؛
• جاڭا ءتىل مەڭگەرۋدى قولعا الىپ كور؛
3. تىنىعۋ
تىنىعىپ بوساڭسۋ تەك دەنەگە قاتىستى ەمەس. مي دا تىنىعۋ كەرەك. زەرتتەۋلەردىڭ كوبى انىقتاعانداي، ۇيقىنىڭ دۇرىس بولماۋى، دۇرىس تىنىقپاۋ ەستە ساقتاۋدى ناشارلاتادى. ال ۇزاققا سوزىلعان كۇيزەلىس وقۋ مەن جاڭا ورتاعا بەيىمدەلۋدى تەجەيدى، - دەيدى ساندجاي گۋپتا.
ءبىر سوزبەن ايتقاندا، مي تىنىعۋ ءۇشىن دۇرىس ۇيىقتاۋ كەرەك. ول كەمىندە 7 ساعات تىنىعۋعا كەڭەس بەرەدى. سوندا مي جۇمىسى دا جاقسارا تۇسەدى. بۇل ءۇشىن مىنا كەڭەستەرىن ۇستانۋدى ءجون سانايدى:
• ۇيىقتار الدىندا كەم دەگەندە 3 ساعات بۇرىن تاماقتانۋ كەرەك؛
• ساعات 14:00 دەن كەيىن قۇرامىندا كوفەين بار سۋسىنداردى ىشۋگە بولمايدى؛
• ۋاقىتىلى جاتىپ، ۋاقىتىلى ويانۋ كەرەك؛
• ۇيىقتار الدىندا ىستىق ۆاننا قابىلداۋ كەرەك نەمەسە كىتاپ وقىعان پايدالى؛
• جاتىن بولمە تىنىش جانە قاراڭعى بولعانى ابزال.
4. دۇرىس تاماقتانۋ
ساندجاي گۋپتا «تاڭدا پاتشا، تۇستە حانزادا، ال كەشكە قاراپايىم شارۋا سەكىلدى تاماقتان» دەگەن قاعيدانى ۇستانادى. SHARP ءادىسىن دە قولدانعان ءجون دەيدى.
S: قانت مولشەرىن ازايتۋ؛
H: كوبىرەك سۋ ءىشۋ؛
ا: قۇرامىندا ومەگا-3 مول تاعامدى كوبىرەك جەۋ؛
R: تاماق مولشەرىن ازايتۋ؛
P: تاماقتانۋدى الدىن- الا جوسپارلاۋ؛
5. قارىم- قاتىناستا بولۋ
قارىم- قاتىناس جاساۋ ءومىردى ءماندى ەتە تۇسەدى. مۇنى عالىمدار الدەقاشان دالەلدەگەن. نەيروحيرۋرگ ءوز سوزىندە، وزگەلەرمەن قارىم- قاتىناس جاساۋ مي جۇمىسىن جاقسارتاتىنىن، كوگنيتيۆتى مۇمكىندىگى ساقتالاتىنىن ايتادى.
ساندجاي گۋپتا بىرەۋمەن قارىم- قاتىناستى قايتا قالپىنا كەلتىرۋ، دوستارمەن جولىعۋ، پىكىر الماسۋعا ۇندەيدى. وسى ارقىلى ادام ميى دا تەزىرەك جۇمىس ىستەۋگە بەيىمدەلە باستايدى.
نەيروحيرۋرگ وسى كەڭەستەردى ۇستانۋعا، ولاردى ءوز جوسپارىڭا قوسۋعا شاقىرادى. الدىمەن بىرەۋىنە باسا ءمان بەرە باستاڭىز. ميىڭىز جاڭا ەرەجەلەرگە قانشالىقتى تەز ۇيرەنىپ، ءومىرىڭىز قانشالىقتى وزگەرگەنىنە تاڭ قالۋىڭىز مۇمكىن.
massaget.kz