شىنجاڭدا سوڭعى 5 ايدا العاش رەت كوروناۆيرۋس جۇقتىرعان ناۋقاس تىركەلدى
بەيجىڭ. قازاقپارات - قىتايدىڭ شىنجاڭ-ۇيعىر اۆتونومياسىندا ءبىر ادام كوروناۆيرۋس جۇقتىردى، تاعى ءۇش ادامنان ىندەتتىڭ سيمپتومسىز ءتۇرى تابىلدى، دەپ حابارلايدى قازاقپاراتتىڭ مەنشىكتى ءتىلشىسى.
ناۋقاس - ءۇرىمجى قالاسىنىڭ تيان-شان اۋدانىندا تۇراتىن 24 جاستاعى ايەل.
ول 10- شىلدەدە كوروناۆيرۋس ينفەكتسياسىنىڭ بەلگىلەرىمەن اۋرۋحاناعا جاتقىزىلعان.
سارسەنبىدە ونىڭ COVID-19-عا تاپسىرعان سىناماسى وڭ ناتيجە كورسەتكەن.
جەرگىلىكتى ب ا ق حابارلاۋىنشا، شىنجاڭدا سوڭعى 145 كۇن بويى ءبىر دە ءبىر ادام كوروناۆيرۋس جۇقتىرماعان.
ەسكە سالا كەتەيىك، شىنجاڭ-ۇيعىر اۆتونومياسىندا COVID-19 ينفەكتسياسىنا شالدىققان العاشقى سىرقات 23- قاڭتاردا تىركەلگەن. جالپى، ايماقتا 76 ادامنان ىندەت تابىلعان.
