قازاقستاندا 5-شىلدەدەن باستاپ قانداي باعىتتاعى پويىزدار توقتايدى
قازاقپارات بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ حابارلايدى.
بۇعان دەيىن 1-شىلدەدەن باستاپ 3 كوممەرتسيالىق پويىزدىڭ قاتىناۋى ۋاقىتشا توقتاعانىن جازعان بولاتىنبىز. ولار:
- №19/20 «نۇر-سۇلتان- اتىراۋ»؛
- №95/96 «نۇر- سۇلتان- ورال»؛
- №701/702 «نۇر- سۇلتان- الماتى».
ەسكە سالا كەتسەك، بۇگىن ق ر پرەمەر-ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا 5-شىلدەدەن باستاپ ەلىمىزدە 14 كۇنگە قاتاڭ شەكتەۋ شارالارىن ەنگىزۋ شەشىمى قابىلداندى. ولاردىڭ اراسىندا تەمىرجول كولىگىمەن جولاۋشىلاردى تاسىمالداۋ بويىنشا دا شەكتەۋلەر بار.
وسىعان وراي، 5-شىلدەدەن باستاپ الەۋمەتتىك ماڭىزى بار ءبىرقاتار باعىتتارعا وزگەرىس ەنگىزىلەدى:
1. №321/322 «الماتى - سارىاعاش» جولاۋشىلار پويىزى توقتاتىلادى.
2. كەلەسى باعىتتاردىڭ قاتىناۋ جيىلىگى قىسقارادى:
- №3/4 «الماتى- نۇر- سۇلتان» كۇنارا (كۇن سايىننىڭ ورنىنا)؛
- № 31/32 «الماتى- پاۆلودار» كۇنارا (كۇن سايىننىڭ ورنىنا)
- № 67/68 «نۇر-سۇلتان- وسكەمەن» كۇنارا (كۇن سايىننىڭ ورنىنا)
- №257/258 «نۇر-سۇلتان- دوستىق» اپتاسىنا 1 رەت (اپتاسىنا 2 رەتتىڭ ورنىنا).
ايتا كەتەيىك، قازاقستان اۋماعىندا توتەنشە جاعداي رەجيمى الىنعاننان كەيىن، پويىز قاتىناسى كەزەڭ-كەزەڭىمەن قالپىنا كەلتىرىلە باستاعان بولاتىن. بۇگىنگى تاڭدا جالپى العاندا 93 پويىز رەيستەردى ورىنداۋدا.