ەلوردادا كوروناۆيرۋس جۇقتىرعاندارمەن قارىم- قاتىناستا بولعاندار ناۋقاستاردان 5 ەسە كوپ
بۇل تۋرالى حابار-24 تەلەارناسىنىڭ تىكەلەي ەفيرىندە نۇر- سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
«كوروناۆيرۋس جۇقتىرعانداردىڭ سانى 1686 ادام بولسا، ولارمەن قارىم- قاتىناستا بولعاندار 5 ەسە، سونىمەن قاتار ءۇي كارانتينىندە وتىرعان ادامدار سانى 4 ەسە كوپ. سوندىقتان ۆيرۋس وتە قاۋىپتى»، - دەدى ەلوردا اكىمى. وسىعان وراي قالا باسشىسى ەلوردا تۇرعىندارىن سانيتارلىق نورمالاردى قاتاڭ ساقتاۋعا ۇندەدى.
«ۆيرۋس وتە قاۋىپتى بولعاندىقتان سانيتارلىق نورمالاردى قاتاڭ ساقتاۋ قاجەت. ءبىزدىڭ ستاتيستيكامىزعا سايكەس، ىندەت جۇقتىرعانداردىڭ 40 پايىزى 30 جاسقا دەيىنگى جاستار، ال 35 پايىزى 30 بەن 50 ارالىعىنداعى ادامدار ەكەن. دەمەك، ۆيرۋس جاس تالعامايدى دەگەن ءسوز. سوندىقتان ءبىز ءوزىمىزدى، جاقىندارىمىزدى قورعاۋعا ءتيىسپىز»، - دەدى التاي كولگىنوۆ.
اۆتور: مارلان جيەمباي
