تالدىقورعاندا تۋعان كۇندى تويلاۋعا جينالعان ءبىر توپ ادامنان 5 قارۋ تاركىلەندى

كريمينالدىق پوليتسيا دەپارتامەنتىنىڭ مالىمەتىنشە، الماتى وبلىسىنىڭ كريمينالدىق پوليتسيا قىزمەتكەرلەرى «اقسۋ اۋدانىندا قارۋى بار ءبىر توپ ادام جينالادى» دەگەن جەدەل اقپارات العان. سول جەرگە جەدەل- تەرگەۋ توبى مەن پوليتسيانىڭ ارنايى بولىنىستەرىنىڭ قىزمەتكەرلەرى اتتانادى.

«قاپال اۋىلىنىڭ شەتىندە ورنالاسقان كىشى شىمبۇلاق ەلدى مەكەنىندە 5 اۆتوماشينامەن كەلگەن 19 ادام ۇستالدى. ولار مانەرلەپ سىرعاناۋشىنىڭ ءبىرىنىڭ تۋعان كۇنىن مەرەكەلەۋ ءۇشىن جينالعان. وبلىس ورتالىعىنىڭ تۇرعىندارىنا تيەسىلى «تويوتا كامري 50» جانە «لەكسۋس 330» ماركالى اۆتوكولىكتەردى تەكسەرۋ كەزىندە 4 تراۆماتيكالىق تاپانشا، 1 اتىس قارۋى جانە 43 پاترون تاركىلەندى» ، دەلىنگەن حابارلامادا. قارۋ مەن وق- دارىلەردى زاڭسىز ساقتاۋ فاكتىلەرى بويىنشا سوتقا دەيىنگى تەرگەۋ باستالدى. سوت- بالليستيكالىق ساراپتاما تاعايىندالدى.

«توتەنشە جاعداي كەزىندە كارانتين رەجيمىن بۇزعانى ءۇشىن 19 ادامعا قاتىستى اكىمشىلىك حاتتاما جاسالدى، ماتەريالدار ۇستالعانداردىڭ تۇرعىلىقتى جەرى بويىنشا سوت قاراۋىندا جىبەرىلدى» ، دەلىنگەن حابارلامادا. ۇستالعان 4 ادامنان اتىس قارۋى الىنىپ، ۋاقىتشا ۇستاۋ يزولياتورىنا قامالدى.