قاۋىپتى 5 ەلدەن ۇشىپ كەلگەندەر شيپاجايلارعا جاتقىزىلادى - الماتى اكىمى

بۇل تۋرالى قالا اكىمى باقىتجان ساعىنتايەۆ مالىمدەدى.

قالا باسشىسى وقشاۋلاۋ ورىندارىنىڭ دايىندىعىمەن تانىستى.

«بۇگىن كوروناۆيرۋستى جۇقتىرۋ بويىنشا 1ا ساناتىنا جاتقىزىلعان ەلدەردەن اۋە قاتىناسى ارقىلى ۇشىپ كەلگەن جانە ناۋقاستارمەن بايلانىستا بولعانداردى وقشاۋلايتىن ورىنداردىڭ دايىندىق جۇمىستارىمەن تانىستىم. بۇگىندە وعان فرانسيا، يران، يتاليا، يسپانيا، گەرمانيا كىرەدى. بۇل — قالا تۇرعىندارىنىڭ اراسىنا ۆيرۋستىڭ تارالۋىنا توسقاۋىل بولۋعا كومەكتەسەدى. 14 كۇندىك كارانتينگە ارنالعان ورتالىقتار «اققايىڭ» ، «قازاقستان»، «كوكتەم» ساناتوريلەرى مەن اسفەندياروۆ اتىنداعى مەدۋنيۆەرسيتەت جاتاقحاناسىنىڭ بازاسىندا قۇرىلادى.

بۇل ج و و- نىڭ تاعى ءبىر جاتاقحاناسىندا قالا ماڭىندا تۇراتىن جانە قالانىڭ ەمحانالارى مەن اۋرۋحانالارىندا جۇمىس ىستەيتىن دارىگەرلەر مەن مەدپەرسونال ورنالاستىرىلدى. كوروناۆيرۋستىڭ تارالۋىنا توسقاۋىل بولۋدىڭ باستى قارۋى - وقشاۋلانۋ. سوندىقتان زاقىمدانۋ وشاقتارى بۇعاتتالدى. ونىڭ ءبىرى — گوگول كوشەسىندەگى ءۇي. مەدەۋ اۋدانىنىڭ اكىمدىگىنە ءتارتىپ ساقتاۋدى، تۇرعىندار ءۇشىن ازىق-تۇلىك جەتكىزۋدى، مەديتسينالىق قىزمەتكەرلەر، سانەپيدەميولوگتار مەن پوليتسەيلەر ءۇشىن جاعداي جاساۋدى تاپسىردىم»، - دەدى قالا اكىمى.

ايتا كەتۋ كەرەك، الماتى بيلىگى كەشە اۋرۋ وشاعى رەتىندە 10 مەكەنجايدى اتاعان بولاتىن. قازىر قازاقستاندا 53 كوروناۆيرۋس جۇقتىرۋ دەرەگى تىركەلدى. نۇرسۇلتان قالاسىندا -28، الماتىدا - 22، قاراعاندىدا -2، الماتى وبلىسىندا 1 جاعداي انىقتالدى.